दैलेख : कोरोना भाइरस (कोभिड–१९) को संक्रमण रोकथाम तथा नियन्त्रणका लागि मुलुक ६४ दिन देखि लकडाउनमा छ ।
सीमा नाका बन्द भए पनि मजदुरीका लागि भारत गएका नागरिकहरु आउने क्रम ह्वात्तै बढेको छ । पछिल्लो एक सातामा पाँच हजार बढी नागरिकहरु दैलेख भित्रिएका छन् । यो संख्या लकडाउनपछि नाकाबाट भित्त्र्याइएको सबै भन्दा बढी हो ।
भारतको विभिन्न क्षेत्रबाट जमुनाहा नाका हुँदै आउने क्रम रोकिएको छैन । जिल्ला प्रशासन कार्यालय दैलेखले झण्डै ४२ हजार नागरिकहरु भारतबाट दैलेख आउने प्रक्षेपण गरेको छ ।सहायक प्रमुख जिल्ला अधिकारी इन्द्रबहादुर क्षेत्रीका अनुसार दैनिक २ हजारको हाराहारीमा नागरिकहरु भित्रिरहेका छन् । स्थानीय तहहरुले स्थानीय रुपमा उपलब्ध सिमित विद्यालयलाई क्वारेन्टाइनको रुपमा प्रयोग गरिरहेका छन् । बढ्दो नागरिको चापका कारण क्वारेन्टाइन व्यवस्थापन गर्न कठिनाइ झेलिरहेका स्थानीय सरकारका लागि यो नयाँ चुनौती हो ।
दैलेखका चार स्थानीय तहमा कोरोना भाइरस संक्रमण फैलिएको छ । एक महिला सहित ८ जनामा कोरोना संक्रमण पुष्टि भईसकेको छ । आठै जना भारतबाट आएका हुन् । संक्रमितमध्ये एक जना सुर्खेत स्थित कोरोना विशेष अस्पताल र अन्य सात जनालाई दैलेख सदरमुकाम स्थित सरस्वती माविमा निर्माण गरिएको आइसोलेसनमा राखिएको छ । जिल्लाभर ४० बेडको आइसोलेसन निर्माण गरिएको छ । झण्डै दुई हजार एक सय जना मात्रै क्वारेन्टाइनमा राखिएको जिल्ला प्रशासन कार्यालयले जनाएको छ ।
नाकामा ठूलो सास्ती खेपेर जन्मथलो आएकाहरु क्वारेन्टाइनमा पनि उस्तै दुःख पाएको बताएका छन् । क्वारेन्टाइनको व्यवस्थापन भद्रगोल हुँदा एउटै कोठामा ३० जनासम्म कोच्चिएर बसिरहेका छन् । क्वारेन्टाइनमा खानेपानी, शौचालय, आड्ने ओछ्याउने देखि खानपिनको पनि समस्या छ ।
विद्यालयको डेक्स बेन्च जोडेर सुत्नु पर्ने बाध्यता रहेको क्वारेन्टाइनमा बसेकाहरु बताउँछन् । जहाँको अस्तव्यस्तताले संक्रमण रोक्ने होइन, स्वस्थ्य मान्छेलाई पनि संक्रमित बनाउने खतरा बढाएको छ ।
सहायक प्रमुख जिल्ला अधिकारी इन्द्रबहादुर क्षेत्रीले भारतबाट फर्किएकाहरुलाई सिधै क्वारेन्टाइनमा पठाउने गरिएको बताउँछन् । उनले क्वारेन्टाइनमा रहेका व्यक्तिहरुलाई स्ंयम अनुशासित भएर स्वास्थ्य सावधानी अपनाउन आग्रह गरेका छन् ।
किट नै सकियो
भारतबाट फर्किनेको सँख्या बढे पनि आरडीटी किट र पीसीआर परीक्षणका लाग भीटीएम अभाव हुँदा परीक्षणमा समस्या देखिएको छ । दैनिकजसो एक हजार नागरिकहरु दैलेख भित्रिएपछि परीक्षण किट अभाव भएको हो ।
स्वास्थ्य सेवा कार्यालय दैलेखका कोभिड–१९ फोकल पर्सन थीरप्रसाद रेग्मीका अनुसार ३० वटा आरडीटी र एक सय ६० वटा भीटीएम किट मात्र मौज्दात छ । यी किट शंकास्पद्को परीक्षणका लागि राखिएको उनले बताए ।
‘किट अभाव हुँदा भारतबाट फर्किनेहरुको कसरी परीक्षण कसरी गर्ने भन्ने अन्यौलता सृजना भएको छ । दैलेखमा १०÷१० हजार आरडीटी किट र भिटिएम आवश्यक देखिएको छ,’ रेग्मीले भने । साथै थप किटका लागि प्रदेश र संङ्घीय सरकारसँग माग गरिएको उनले बताए ।
प्रतिक्रिया दिनुहोस !
