व्यास नगरपालिकाको बजेट एक अर्ब ५३ करोड
दमौली : व्यास नगरपालिकाले करिब एक अर्ब ५३ करोड बजेट पेश गरेको छ । ३३ औं नगर सभामा बजेट प्रस्तुत गर्दै नगर उपप्रमुख मिरा जोशीले कोरोना भाइरसका कारण नीति तथा कार्यक्रम समयमा ल्याउन समस्या परेको बताइन् । जिल्लाकै ठूलो बजेट ल्याएको नगरले कुल बजेटको ४१ प्रतिशत ६२ करोड ७१ लाख ९७ हजार पुँजीगत र चालु खर्चका लागि ९० करोड २५ लाख प्रस्ताव गरेको छ ।
कोरोनाका कारण सम्पन्न हुन नसकेका योजनाका लागि क्रमगत रुपमा २० करोड ८० लाख विनियोजन गरेको नगरपालिकाले शिक्षा, युवा तथा खेलकुदका लागि भन्दै ४४ करोड बजेट विनियोजन गरेको छ । नगरपालिकाले आफ्ना नगरस्तरीय योजना छनौट गरी बजेटको धेरै हिस्सा खर्च गर्ने लक्ष्य राखेको छ । नगर सभामा प्रस्तुत बजेटमा व्यासको एक सय आठ फिट अग्लो मूर्ति र व्यास १० को नारेश्वर तालका लागि समान डेढ करोड विनियोजन गरिएको छ । नगरपालिकाले कोरोना कोष व्यवस्थापनका लागि भन्दै एक करोड बजेट विनियोजन गरेको छ ।
नगरपालिकाले कृषि तथा पशु सेवाका लागि १० करोड बजेट विनियोजन गरेको छ । नगरको बजेटमा प्रदेस सरकारबाट प्राप्त नरंगा कलेस्ती फाँट सिंचाई योजनाको ५० लाख पनि समावेश छ । मादी नदीको एकिकृत विकास परियोजनाका लागि बजेटमा ७० लाख विनियोजन गरिएको छ ।
नगरले सडक र नालाका लागि दुई करोड विनियोजन गरेको छ । बजेट प्रस्तुतीकरण कार्यक्रममा व्यास नगर प्रमुख बैकुण्ठनाथ न्यौपानेले दुई वर्ष अघिदेखि निरन्तर बजेट गए पनि सम्पन्न हुन नसकेका योजनामा अब बजेट नदिइने बताए । ‘लामो समयदेखि निरन्तर बजेट जाने र काम हुन नसकेका योजनामा अब बजेट जाँदैन,’ उनले भने । आगामी असार २५ गते पुनः बस्ने गरी नगरपालिकाको बजेट लक्षित नगर सभा स्थगित गरिएको छ ।