बालविवाह प्रकरण : जान्दाजान्दै समाजले थुक्ने डरले गल्ती गर्यौं
दमौली : बेहुली १४ वर्षकी अनि बेहुला २१ वर्षका। लकडाउनकै बेलामा बिहे। दुवै परिवारका सदस्य भेला भएर वैवाहिक कार्य सम्पन्न भयो। तर दुलही अन्माउनै लाग्दा प्रहरी पुगेपछि दुलाहासहित उनी र बेहुलीका बाबु, आमा र पण्डित प्रहरी हिरासतमा छन्। व्यास-११ मा बुधबार घटेको घटनाको सूचना पाएपछि पुगेको प्रहरीले दुलही अन्माएर बिदाबादी हुन लागेका गोरखा लखन गाउँपालिका-२ का २३ वर्षका बेहुला सन्तोष अर्यालसहित उनका बाबुआमा र दुलहीका बाबुआमा अनि बिहे गराउने कार्यमा सरिक ७५ वर्षका पण्डितसमेतलाई पक्राउ गरेर हिरासतमा राखेको छ।
उनीहरुमाथि अनुसन्धानका लागि भनेर अदालतबाट म्याद लिइएको प्रहरी नायब उपरीक्षक युवराज तिमिल्सेनाले बताए। ‘बाल विवाह हुन लागेको सूचनाका आधारमा टोली खटाएका थियौं’ उनले भने‘विवाह सकेर घर लैजाने तयारी हुँदै गर्दा उनीहरुलाई नियन्त्रणमा लिएका हौं।’कानूनले २० वर्ष नपुगी विवाह गर्न नपाउने भनेको छ। यस घटनामा बेहुलाको उमेर पुगे पनि बेहुलीको उमेर नपुगेकाले दुवै पक्षलाई नियन्त्रणमा लिइएको प्रहरीको भनाई छ। कानुनले छुट नदिएको जान्दाजान्दै बिहे गर्ने निष्कर्षमा परिवार कसरी पुग्यो त? अहिले बेहुलीका बाबु आमा दुवै हिरासतमा छन्। उनका दाजु भन्छन्,‘हामीलाई कानून विपरित हो भन्ने थाहा नभएको होइन तर हामी बाध्यतामा पर्यौं। कलिलै उमेरमा बहिनी दिनुपर्ने के बाध्यता आइलाग्यो त? उनी भन्छन्‘बिहे नगरे भागेर जान्छु नभए मर्छु भनेपछि के गर्नु। बरु दुवै परिवारकै सहमतिमा बिहे गरेरै दिऔं भनेका हौं।'
दुईको प्रेममा समाजको डर
‘यस अघि कुरा गर्दा समाजले पनि अनुमति दिएकाले अघि बढेका हौं’उनले भने‘समाजले हुँदैन भनेको भए पहिले नै रोक्थ्यौं तर सबैले हुन्छ भनेपछि बिहे आँटेका हौं।’ कतिपय ठाउँमा कलिला किशोर किशोरी आत्महत्यासम्मको अवस्थामा पुगेकाले पनि परिवारलाई यस विषयले पनि छोएको रहेछ। ‘बरु बिहे गरेर दिए त उसले त मर्नु पदैन भन्ने पनि भयो’दाजुले भने। उनले जान्दाजान्दै पनि गल्ती भएको भन्दै पश्चाताप गरे। ‘बिहे गरेर नदिउँ समाजले थुक्ने अनि ज्यानै जाने डर’ पीडा भावमा उनले भने‘दिँदा कानुन उल्लंघनको डर। हामीले गल्ती गर्यौं। अब के गरुँ कसो गरुँ।'