पृथ्वी राजमार्गको तनहुँखण्डमा ठाउँठाउँमा पहिरो
दमौली : निरन्तर वर्षा हुने क्रम नरोकिएपछि ठाउँठाउँमा पहिरो जाँदा तनहुँस्थित पृथ्वी राजमार्गको यातायात रोकिएको छ । पृथ्वी राजमार्गका कम्तिमा चार ठाउँमा ठूलो पहिरो जाने तथा सडक भाँसिने समस्या देखिएको प्रहरीले जनाएको छ ।
पृथ्वी राजमार्गअन्र्तगत तनहुँ बन्दीपुरको नहालामा सडक नै भाँसिएको छ । करिब पाँच मिटर सडक भासिएकाले त्यस क्षेत्रमा यातायात अवरुद्ध हुन पुगेको प्रहरी नायब उपरीक्षक युवराज तिमिल्सेनाले बताए ।
यसैगरी राजमार्गअन्र्तगत बन्दीपुरकै बिमलगरमा पहिरो खस्दा यातायात रोकिएको छ । विहानै पहिरो खस्दा आगमनमा कठिनाई भएको तनहुँको आँबुखैरेनी गाउँपालिकास्थित ऐनापहरामा फेरि पहिरो खसेपछि यातायात सम्पर्क टुटेको छ ।
डुम्रे बेसिसहर सडक पनि अवरुद्ध
पृथ्वी राजमार्गका अलावा लमजुङ सदरमुकाम बेसिसहरसँगको यातायातको एक मात्र माध्यम डुम्रे बेसिसहर सडक सोमबारदेखि नै अवरुद्ध छ । भानु नगरपालिकाको भन्सारदेखि लमजुङको सीमानासम्म ठाउँ ठाउँमा पहिरो खसेको भानु ९ का वडाध्यक्ष निलमसंजिवा श्रेष्ठले बताए ।
मुख्य गरी रानीपानीमा करिब १० मिटर कालोपत्रेमुनिको जमिन नै खसेका कारण यातायात नियमित गराउन कठिनाई परेको छ । सडक खुलाउन सडकका अधिकारीहरुले सडकको अवलोकन गरे पनि राजमार्ग नै अवरुद्ध भए पछि त्यस क्षेत्रमा यातायात नियमित बनाउने ठूलो चुनौती सडक अधिकारी सामु देखिएकाले डुम्रे बेसिसहर सडक तत्काल नियमित हुने सम्भावना कम देखिएको छ ।