राजविराज : सप्तरीको राजविराज नगरपालिका र तिलाठी कोइलाडी गाउँपालिकामा ठूलो सङ्ख्यामा संक्रमित बढेपछि सप्तरी जिल्लामा कोरोना संक्रमित हुनेको संख्या पाँच सय नाघेको छ। राजविराज नगरपालिका–६ र तिलाठी कोइलाडी गाउँपालिका–२ लौनियामा पुष्टि भएका संक्रमितको सम्पर्कका व्यक्तिहरुमा गरिएको परीक्षणपछि जिल्लामा संक्रमितको सङ्ख्या ५ सय ३१ पुगेको हो।
स्वास्थ्य तथा जनसङ्ख्या मन्त्रालयले सोमबार सप्तरीले ५१ जनामा संक्रमण पुष्टि गरेको थियो। मंगलबार सात जना नयाँ संक्रमित फेला परेकेको स्वास्थ्य कार्यालय सप्तरीले जनाएको छ। जसमध्ये ६ जना प्रहरी र एक जना बिमा कम्पनीका कर्मचारी हुन्। उच्च अदालत जनकपुर, राजविराज इजलासबाट स्वाब संकलन गरिएका १ सय ९ मध्ये ७ जनामा संक्रमण देखिएको स्वास्थ्य कार्यालय सप्तरीका निमित्त प्रमुख दुनियालाल यादवले बताए।
मन्त्रालयले सोमबार पुष्टि गरेको ५१ जना संक्रमितमध्ये तिलाठी कोइलाडी गाउँपालिका–२ लौनियाका २५ जना र राजविराज नगरपालिकाका विभिन्न वडाका २० जना रहेका छन्। बाँकी हनुमाननगर कंकालिनी नगरपालिकाका चार जना तथा तिरहुत र अग्नीसाइर कृष्णसवरण गाउँपालिकाका १-१ जना रहेका छन्। 
प्रतिक्रिया दिनुहोस !
