विराटनगर : विराटनगरमा एउटा फोटो स्टुडियोलाई नै नक्कली नागरिकता उत्पादन गर्ने केन्द्र बनाइएको तथ्य खुलेपछि गिरोहका दुई जना बुधबार पक्राउ परेका छन् । मजदुरी गरेर जीवनयापन गरिरहेकी एकल महिला मनिषा कामतले नागरिकता बनाई दिन भन्दै विराटनगर–११ का ६५ वर्षीय अशोककुमार श्रेष्ठलाई एक लाख ३० हजार रुपैयाँ बुझाएकी थिइन् ।
उनले फोटो र आवश्यक कागजात बुझाएको तीन दिनमै आफू र आफ्ना मामाको नागरिकता प्राप्त गरिन् । पछि राष्ट्रिय परिचयपत्र बनाउन जिल्ला प्रशासन कार्यालय मोरङ पुगेकी कामतलाई कर्मचारीले नागरिकता नक्कली भएको जानकारी दिए । त्यही क्रममा निरीक्षणमा रहेका मोरङका प्रमुख जिल्ला अधिकारी युवराज कटेलले कागजात परीक्षण गरी नक्कली भएको पुष्टि गरेपछि तत्काल प्रहरी परिचालन गरिएको थियो । प्रहरीले श्रेष्ठलाई नियन्त्रणमा लिँदा उनको साथबाट थप १० थान नक्कली नागरिकता बरामद भएको छ । बरामद नागरिकतामा नेपाल सरकारको होलोग्राम, कार्यालयको छाप र जारी गर्ने अधिकृतको हस्ताक्षर समेत अत्यन्त मिल्दोजुल्दो रूपमा प्रयोग गरिएको थियो ।
ती कागजातमा २०६८ देखि २०८२ सालसम्मका मिति राखिएका छन् । नक्कली नागरिकतामा हाल कार्यरत र सरुवा भइसकेका अधिकृतहरूको हस्ताक्षर समेत प्रयोग गरिएको पाइएको छ । जन्मदर्ता, नागरिकता र राष्ट्रिय परिचयपत्रका विभिन्न सरकारी फाराम तथा वडाका नक्कली सिफारिसपत्रहरू पनि बरामद भएका छन् । अनुसन्धानका क्रममा विराटनगर–५ का ३८ वर्षीय धनदेव राजवंशीको संलग्नता खुलेपछि उनलाई पनि पक्राउ गरिएको छ ।
उनले महेन्द्र चोकस्थित ‘न्यू डोली फोटो सर्भिसेज’ सञ्चालन गर्दै आएका थिए । प्रारम्भिक अनुसन्धानअनुसार सोही स्टुडियोलाई नक्कली नागरिकता डिजाइन र प्रिन्ट गर्ने स्थानका रूपमा प्रयोग गरिएको थियो । प्रारम्भमा संलग्नता अस्वीकार गरेका राजवंशीले पछि श्रेष्ठले उपलब्ध गराएका विवरणका आधारमा १०–११ वटा नागरिकता प्रिन्ट गरेको स्वीकार गरेका छन् ।
प्रहरीले स्टुडियोबाट आवश्यक उपकरण र कागजात समेत नियन्त्रणमा लिएको छ । प्रजिअ कटेलले यो संगठित अपराध भएको बताउँदै होलोग्राम, हस्ताक्षर र लेमिनेसन समेत नक्कल गरी सर्वसाधारणलाई ठगी गर्ने कार्य गम्भीर अपराध भएकाले संलग्नलाई कडा कानुनी कारबाही गरिने बताए । पक्राउ परेका दुवै जनालाई बरामद दसीसहित थप अनुसन्धान र कारबाहीका लागि जिल्ला प्रहरी कार्यालय मोरङमा राखिएको छ ।
प्रतिक्रिया दिनुहोस !
