गर्भवतीमा कोरोना देखिएपछि 'रिफर', एम्बुलेन्सले बोक्नै मानेनन्
भदौ १, २०७७ सोमबार १७:१७:०
बुटवल : प्रदेश गौरवका तीन योजनामध्येको एक लुम्बिनी प्रादेशिक अस्पतालले कोरोना संक्रमित गर्भवतीलाई भर्ना नलिइ नेपालगञ्ज 'रिफर' गरेको छ । अस्पतालमा नियमित स्वास्थ्य चेकजाँच गराएकी उनलाई सुत्केरी हुने समयमै आएर कोरोना देखिएपछि नेपालगञ्ज रिफर गरिएको छ ।
कोरोना महामारीको करिब ६ महिना हुँदासम्म लुम्बिनी अस्पतालले संक्रमित अप्रेसन कक्ष तयार गरेको छैन । केही महिनाअघि नै अस्पताल व्यवस्थापन समितिका अध्यक्ष सुर्यबहादुर भट्टराई र मेडिकल सुपरिटेण्डन डा. राजेन्द्र खनालले अस्पतालले सुत्केरीको अप्रेसन कक्ष तयार हुँदै गरेको बताउँदै आएका थिए ।
महामारी सुरु भएपछि कर्मचारीका लागि बस र ओपिडीका लागि थुप्रै संरचना बनाएको अस्पतालले अप्रेसन गर्ने बिरामीको उपचारमा भने तयारी नगरेको देखिएको छ । लुम्बिनी प्रादेशिक अस्पतालमा यस क्षेत्रमै सबैभन्दा धेरै महिला सुत्केरी हुन्छन् । रेफरल अस्पताल हुदाँसमेत गर्भवतीको अप्रेसन गर्न नसकेको भन्दै अस्पतालको चर्को आलोचना समेत भएको छ ।
बुटवल वडा नम्बर ११ कि गर्भवतीको भर्दा सात गते अप्रेसन गर्नुपर्ने मिति चिकित्सकले तोकिदिएका थिए । साउन ३२ गते शरीर दुखेर अस्पताल पुगेकी उनमा कोरोना भए नभएको चेकजाँच गरिएको थियो । उनका श्रीमान् कोरोना संक्रमित भएकाले उनमा समेत पोजिटिभ आएको छ ।
पोजिटिभ देखिएलगत्तै अस्पतालका डाक्टरले नेपालगञ्ज वा काठमाडौं रिफर गरेका थिए । अस्पतालका मेसु डा. राजेन्द्र खनालले अप्रेसन कक्ष तयार भइनसकेका कारण रिफर गरिएको जानकारी दिए ।
लुम्बिनी अस्पतालले रिफर गरेपछि गभर्वती नेपालगञ्ज पुगेका छिन् । उनलाई नेपालगञ्ज जान एम्बुलेन्सले समेत बोक्न तयार भएनन् । एम्बुलेन्स तयार नभएपछि निजी गाडीमै बाँके निस्किएको गर्भवतीका एक आफन्तले बताए ।
नेपालगञ्जमा यसअघि पनि गर्भवतीको अप्रेसन गरिएको थियो । नेपालगञ्ज मेडिकल कलेजमा रुकुमकी संक्रमित महिलाको अप्रेसन भएको थियो । अस्पतालले बिरामीको उपचारमा संवेदनशील नभएको आराप लगाइएको छ ।
अधिकारकर्मी इन्दिरा आचार्यले प्रदेशको गौरवपूर्ण भनिएको अस्पतालमा संक्रमित सुत्केरीको अप्रेसन हुन नसक्नु गम्भीर कुरा रहेको बताइन् । 'संक्रमित सुत्केरीको उपचार गर्ने व्यवस्था छैन, बालबालिकाको अप्रेसन गर्ने डाक्टर छैनन्, यस्तो पनि गौरवको प्रादेशिक अस्पताल हुन्छ ? उनले प्रश्न गरिन्?'
प्रतिक्रिया दिनुहोस !
