ब्रसेल्स : गैर आवासीय नेपाली संघको यूरोपियन क्षेत्रीय सम्मेलन आगामी अक्टोबर ३ र ४ मा हुँदैछ ।
'मातृभूमिको लागि सीप र ज्ञान, महिला तथा युवा आवाजको लागि हाम्रो अभियान' नारासहित गरिने यूरोप क्षेत्रीय सम्मेलन भर्चुअल रूपमा सञ्चालन हुनेछ । गैरआवासीय नेपाली संघ युरोप संयोजक नारायण आचार्यका अनुसार उक्त ११ औँ क्षेत्रीय सम्मेलनपछिको बैठक पर्यटन मन्त्री योगेश भट्टराईले उद्घाटन गर्नेछन् ।
हाल संघको विभिन्न क्षेत्रीय सम्मेलन भइरहेका बेला यूरोप क्षेत्रीय सम्मेलन विशेष रहने यूरोप संयोजक आचार्यको दाबी छ । महिला सम्मेलनमा अभिनेत्री मनिषा कोइराला, नेत्री रामकुमारी झाँक्री, अनुराधा कोइराला लगायतको उपस्थिति हुनेछ ।
यूरोप महिला संयोजक योगिता थापाले यूरोपको यस कार्यक्रमलाई अझ प्रभावकारी बनाउन मिडिया संयोजकको रूपमा यूरोप क्षेत्र सहसंयोजक शुक्र न्यौपानेको संयोजकत्वमा मिडिया समितिको समेत घोषणा गरेको बताइन् ।
समितिको सल्लाहकारहरूमा एनआरएनए केन्द्रीय प्रवक्ता डिबी क्षेत्री, भगिरथ योगी, केजिन राई , नरेश खपाङ्गी, ओम शर्मा, योगेन्द्र मिलन छन्त्याल, विपिन निरौला सहितको मिडिया समितिको घोषणा गरिएको छ ।
सम्मेलनको पहिलो दिन युरोपमा नेपाली पत्रकारिता, महिला, युवा,यूरोपभरका राष्ट्रिय समन्वय परिषद गतिविधि, नेपाली नागरिकताको निरन्तरता र मताधिकार, गोर्खा सवाल बारे छुट्टा छुट्टै शेसनमा छलफल र बहस हुने बताइएको छ । दोश्रो दिन कृषि ,उर्जा र वातावरण, विज्ञान प्रविधि, स्वास्थ्य र चिकित्सा पूर्वाधार लगायत विज्ञहरुले कार्यपत्र प्रस्तुत गर्दै छलफल गर्नेछन् ।
प्रतिक्रिया दिनुहोस !
