उखु किसान यादवको मृत्युपछि परिवारको बिचल्ली
मलंगवा : सर्लाहीको धनकौल गाउँपालिका ७ का ६४ वर्षीय उखु किसान नारायण राय यादवको मृत्यु भएपछि परिवार बिच्चलीमा परेको छ ।
१९ जनाको परिवार रहेको यादव संसार छोडेर गएपछि परिवारसहित गाउँ नै शोकमा डुबेको छ । घरमा अहिले पनि २५ लाख ऋण रहेको परिवारले बताएको छ ।
बुबा संसार छोडेर गएपछि आफूहरुको बिच्चली भएको नारायण राय यादवका जेठा छोरा सीयाराम रायले बताए । ‘ऋण भए पनि बुबा हुँदा हामीलाई कुनै चिजको चिन्ता थिएन् । बुबाले नै घर व्यवहार चलाउनु हुन्थ्यो’, उनले भने, ‘अहिले पनि तीन बैंकको २५ लाख भन्दा बढी ऋण छ । खेती गर्नका लागि र ट्याक्टर किन्नका लागि तीनवटा बैंकसँग बुबाले ऋण लिनुभएको थियो ।’
धनकौलमा रहेको अन्नपूर्ण सुगर मिलमा उखुको २४ लाख रुपैंया बाँकी छ । उद्योगले पैसा दिए ऋण तिर्न सकिन्थ्यो । आर्थिक वर्ष २०७३÷०७४ को २ लाख र २०७४÷०७५ को २२ लाख बाँकी छ । उखु दियौं तर उद्योगीले पैसा सट्टा बुबाको ज्यान लिएको सीयारामको आरोप छ । उद्योगीले समयमा पैसा दिएको भए हामी टुहुरा हुदैन्थ्यौं । उद्योगीका कारण हाम्रो परिवार अहिले बर्बाद भएको बताए ।
‘गाउँका किसानसहित बुबा मंसिर २८ गते बाँकी भुक्तानी लिनका लागि काठमाडौंमा आन्दोलन गर्न जानुभयो । यसपाली पैसा लिएर नै घर आउँछु भनेर बुबा जानुभएको थियो’, उनले भने, ‘तर, न त पैसा लिएर आउनु भयो न खाली हात । पैसाको साटो कात्रोमा बेरिएर बुबाको शरीर घरमा आइपुग्यो ।’
सरकारसँगको सहमति भएपछि पैसा पाउँछु कि भनेर ठूलो आशा पलाएको थियो । बुबाको नाममा १ लाख ६५ हजार र मेरो नाममा २६ हजार रकम खातामा आएको थियो । बुबाले केही पैसा गएको छ । हेर्नु भनेर फोन गरेर भन्नु भएको थियो । बाँकी पैसा ७ दिनमा दिएपछि पैसा लिएर नै घर आउँछु भनेर फोन गरेका थिए ।
‘गत मंगलबार बिहान अचानक फोन आयो । बुवाले नै गर्नु भएको थियो । फोनमा बुबाले म शौचालय गएको बेला बेहोस भएर लडेको घटना सुनाउनु भयो । घरबाट उपचार गराउनका लागि आउ भनेर पनि भन्नु भयो । मलाई जान समय लाग्ने भएको गाउँका एकजना किसानलाई फोन गरी बुबालाई उपचार गराउन अस्पताल लैजानु म आउँदै छु भने । केही बेरमा फेरि फोन आउँदा बुबाको मृत्यु भएको खबर सुन्नु पर्यो ।’
न्यायका लागि आन्दोलनमा गएका उनको बुधबार २ बजे अन्तिम संस्कार गरिएको छ । मृत्युपछि कृषी मन्त्रालयले २५ हजार सहयोग गरेको छ । अरु कतैबाट सहयोग नआएको उनको गुनासो छ ।
आफूले उब्जाएको अन्नबालीको पैसा लिन ज्यान नै दिनुपर्ने यो कस्तो जमाना आएको भन्दै स्थानीय मनोज यादवले गुनासो गरेका छन् । किसानको हत्या गर्ने उद्योगीलाई राज्यले कारबाही गर्नुपर्ने माग मनोजको छ ।
मृतक नारायणराय यादवलाई कृषक शहिद घोषणा गर्नुपर्ने, पीडित परिवारलाई क्षतिपूर्ती दिनुपर्ने र परिवारको एकजना रोजगार दिनुपर्ने माग आफुहरुको रहेको मनोजले बताएका छन् ।
यादवको मृत्युले धनकौल गाउँपालिका ७ शोकमा डुबेको छ । यादवको मृत्युले आफूहरुले अभिभावक गुमाएको स्थानिय मनोज यादवले दुखेसो पोखे ।