विराटनगर : विराटनगरबाट झन्डै पाँच लाख रुपैयाँ प्रतिबन्धित भारतीय नोटसहित एक युवा र एक युवती पक्राउ परेका छन् ।
सशस्त्र प्रहरी बल बीओपी विराटनगर रानीबाट सहायक निरीक्षकको नेतृत्वमा खटिएको टोलीले मोरङको सुन्दरहरैँचा नगरपालिका–१ की २२ वर्षीया अञ्जली झा र विराटनगर महानगरपालिका–१५ का २६ वर्षीय रञ्जीत चौधरीलाई पक्राउ गरेको हो ।
झोलामा भारतीय रुपैयाँ बोकेर नेपालतर्फ पैदल नै आउँदै गरेको अवस्थामा दुवै जना नेपाल–भारत सीमा क्षेत्र विराटनगर–१६ दरैयाबाट पक्राउ परेका हुन् ।
युवतीले बोकेको झोलाबाट अवैध रकम बरामद भएको हो । उनीहरुको साथबाट पाँच सय दरका सात सय र दुई हजार दरका ७४ वटा भारतीय नोट गरेर चार लाख ९८ हजार रुपैयाँ बरामद भएको सशस्त्र प्रहरीले जनाएको छ । पाँच सय दरमाथिका भारतीय नोट बोक्न नेपालमा प्रतिबन्धित छ ।
पक्राउ परेकाहरु के कामले भारत गएका हुन् तथा के प्रयोजनका लागि प्रतिबन्धित नोट अवैध रुपमा लिएर नेपाल आएका हुन् भन्ने बारेमा खुल्न बाँकी रहेको र यस विषयमा अनुसन्धान थालिएको सशस्त्र स्रोतले बतायो ।
सशस्त्र प्रहरी बल प्रदेश १ का प्रमुख डीआईजी वंशीराज दाहालले बरामद भएको रकमसहित दुवै जनालाई आवश्यक कारबाहीका लागि शनिबार विराटनगर भन्सार कार्यालयमा बुझाइएको बताए।
चेकजाँचका क्रममा स्रोत नखुलेको रकम र प्रतिबन्धित नोटसहित हिँडिरहेको फेला परेपछि उनीहरुलाई शुक्रबार दिउँसो ३ बजेतिर पक्राउ गरिएको जानकारी उनले दिए ।
प्रतिक्रिया दिनुहोस !
