कपिलवस्तु: कपिलवस्तु नगरपालिका वडा नं. ८ बेलौहामा विवाहेतर सम्बन्धका कारण एक युवकको ज्यान गएको छ । स्थानीय १८ वर्षीय युवक विजयबहादुर कुर्मीलाई आफ्नी पत्नीसँग अनैतिक सम्बन्ध राखेको भन्दै कपिलवस्तु नगरपालिका वडा नं. ८ का ३२ वर्षीय रमेश कुर्मीले कुटपिट गर्दा ज्यान गएको प्रहरीले जनाएको छ ।
हत्या आरोपमा रमेशसँगै उनका २३ वर्षीय भाइ अनिल कहार र २२ वर्षीय पत्नी बासमति कहारलाई समेत प्रहरीले पक्राउ गरेको नायब प्रहरी उपरीक्षक धर्मराज भण्डारीले बताए ।
कुटपिटपछि भएको हत्यामा घटनाका बेला छरछिमेकमा गुहार नमागेको र घटनालाई गोप्य ढंगमा लुकाइ राखेको भन्दै प्रहरीले रमेश कहारकी पत्नी बासमति कहारलाई पनि पक्राउ गरेको छ । प्रहरीको अनुसन्धान अनुसार बासमति र मृतक विजयबीच केही वर्ष अघिदेखि विवाहेतर सम्बन्ध रहँदै आएको थियो ।
गत बिहीबार रमेश छिमेकीको छिमेकीको विवाहमा गएको मौका छोपी रमेशकी पत्नी बासमतिले विजयलाई घरमा बोलाएको अनुसन्धानले देखाएको छ । तर रमेश अचानक सोही रात विवाहबाट फर्केर घर आउँदा एउटै कोठामा आफ्नी श्रीमतीसँगै विजयलाई देखे । रमेश र उनका भाइ अनिलले विजयलाई निर्घात रुपमा कुटपिट गरे ।
कुटपिटपछि विजयको सोही राति रमेशकै घरमा मृत्यु भयो। बासमति र भाइ अनिलको सहयोगमा रमेशले विजयको शव घर नजिककैको पोखरीमा फालेको प्रहरीको अनुसन्धानमा खुलेको छ ।
घटनाको चार दिनपछि मात्र प्रहरीले कपिलवस्तु नगरपालिका वडा नं. ८ पूर्व डिही बेलौहास्थित सरकारी पोखरीमा विजयको शव फेला पारेको प्रहरी नायब उपरीक्षक भण्डारीले बताए । "घटना बारे थप अनुसन्धान गर्दा अनैतिक प्रेम सम्बन्धका कारण बासमतिले पति नभएको मौकामा विजयलाई घरमा बोलाइन् । तर सोही राति अचानक उनका पति अनिल घरमा आएका कारण घटना घट्यो” प्रहरी नायब उपरीक्षक भण्डारीले भने ।
पक्राउ परेका तीन जनामाथि कर्तव्य ज्यान मुद्दामा थप अनुसन्धानका लागि जिल्ला अदालतबाट म्याद थप गरी जिल्ला प्रहरी कार्यालयमा थुनामा राखिएको प्रहरी उपरीक्षक नवराज अधिकारीले बताए । घटनालाई आत्महत्या जस्तो देखाउने प्रयास गरिए पनि प्रहरीको सुक्ष्म अनुसन्धानबाट घटना हत्या भएको प्रहरीले ठहर गरेको छ ।
प्रतिक्रिया दिनुहोस !
