हेटौंडा: देशकै राजधानी रहेको प्रदेश वागमती प्रदेशमा महिलाहरु असुरक्षित बन्दै गएको प्रहरीको तथ्यांकले देखाएको छ ।
वागमती प्रदेश प्रहरी कार्यालयको तथ्याङ्क अनुसार आर्थिक वर्ष २०७६/७७ को तुलनामा २०७७/७८ मा जवर्जस्ती करणीको संख्या बढेको छ ।
आर्थिक वर्ष २०७६/७७ उपत्यका वाहेक दश जिल्लामा दुई सय ५६ वटा जवर्जस्ती करणीको मुद्दा दर्ता भएकोमा आर्थिक वर्ष २०७७/७८ मा तीन सय सात वटा मु्द्दा दर्ता भएको कार्यालयले जनाएको छ ।
गत आर्थिक वर्ष २०७७/७८ मा सबैभन्दा धेरै मुद्दा प्रदेश राजधानी रहेको मकवानपुरमा ६५, चितवनमा ६२ र सिन्धुलीमा ३४ वटा रहेको प्रदेश प्रहरी कार्यालयका प्रवक्ता महराज अधिकारीले बताए । उनका अनुसार अघिल्लो आर्थिक वर्ष चितवनमा सबैभन्दा धेरै ५१ वटा मुद्दा दर्ता भएको थियो । गत आर्थिक वर्षमा सबैभन्दा कम रसुवामा तीन वटा मुद्दा दर्ता भएको तथ्याङ्क छ ।
जवर्जस्ती करणी प्रयास भने गत आर्थिक वर्ष २०७७/७८ मा ८९ वटा भएको छ । अघिल्लो आर्थिक वर्षमा जवर्जस्ती करणी प्रयासका ८६ वटा मुद्दा दर्ता भएको प्रवक्ता अधिकारीले बताए ।
गाउँघरमा बाल बिवाहको संख्या बढ्दो क्रममा रहे पनि प्रहरीमा उजुरी पर्ने क्रम भने न्युन रहेको छ । अघिल्ला आर्थिक वर्षमा ९ वटा मुद्दा परेको गत आर्थिक वर्ष २०७७/७८ मा पनि ९ वटा मुद्दा परेको कार्यालयको तथ्याङ्क छ । घरेलु हिंसा सम्बन्धी मुद्दा दर्ता पनि आर्थिक वर्ष दुबै आर्थिक वर्षमा समान संख्या ११ सय २६ रहेको छ ।
वागमती प्रदेशमा आत्महत्या गर्नेहरुको संख्या पनि बढेको तथ्यांकमा छ । आर्थिक वर्ष २०७७/७८ मा एक हजार ३६ जनाले आत्महत्या गरेकोमा अघिल्लो आर्थिक वर्षमा ९ सय ३५ जनाले आत्महत्या गरेको कार्यालयको तथ्याङ्क छ ।
सवारी दुर्घटनामा मृत्यु हुनेको संख्या भने घटेको छ । अघिल्लो आर्थिक वर्षमा चार सय सात जनाको मृत्यु भएकोमा गत आर्थिक वर्ष २०७७/७८ मा तीसय ४९ जनाको मृत्यु भएको प्रदेश प्रहरी कार्यालयले जनाएको छ ।
प्रतिक्रिया दिनुहोस !
