कर्णाली डुंगा अपडेट : घाइते आमाको मृत्यु, बेपत्ता तीनजना अझै भेटिएनन्

धनगढी : कैलाली र सुर्खेतको सीमाना भएर बग्ने कर्णाली नदीमा आइतबार दिउँसो १२ तिर डुंगा पल्टिदा घाइते भएकी १९ वर्षीया धनसरा सलामीमगरको मृत्यु भएको छ । जिल्ला प्रहरी कार्यालय कैलालीका प्रवक्ता डिएसपी प्रतिव विष्टले गम्भीर घाइते अवस्थामा रहेकी धनसराको मृत्यु भएको बताए ।

कैलालीको मोहन्याल गाउँपालिका ३ बाट गर्भ जाँच र बच्चालाई खोप लगाउनका लागि १० जना स्थानीय आइतबार सुर्खेतको चौकुने गाउँपालिका जान भनी कर्णालीमा काठको डुंगामा चढेका थिए । पानीको बहाव बढी भएकाले नदीको बीचमा पुगेपछि डुंगा पल्टिएको थियो।

इलाका प्रहरी कार्यालय चिसापानीका प्रहरी निरीक्षक पुस्करराज पन्तले कैलालीको मोहन्याल गाउँपालिका ३ की २० वर्षीया उर्मिला सलामी मगर, उनका १० दिनका नवजात शिशु र सोही वडाकी २० वर्षकी पार्वती थापा बेपत्ता भएको बताए । 

धनसराका घाइते छोरा १ महिनाका कर्ण सलामी मगर अवस्था सामान्य रहेको प्रहरीले जनाएको छ । शनिबार राति परेको अविरल वर्षापछि कर्णाली नदीमा पानीको बढाव थियो । 

पानीको तीब्र बेगका कारण काठको डुंगा पल्टिएको प्रहरीले जनाएको छ । कर्णालीमा स्थानीय प्रहरी र स्थानीयले बेपत्ताको खोजी गरिरहेका जिल्ला प्रहरी कार्यालय कैलालीले जनाएको छ ।

मोहन्याल ३ का नागरिक स्वास्थ्य उपचार, बालवालिकाको खोपका लागि सुर्खेत जाने गर्छन् । कैलालीको लम्की टिकापुर आउनु भन्दा उनीहरुलाई कर्णाली तरेपछि सुर्खेत नजिक पर्छ ।