पोखरा : दोस्रो संस्करणको टाईगर कप आमन्त्रित क्लबस्तरीय महिला तथा पुरुष भलिबल प्रतियोगितामा महिलातर्फ न्यू डायमण्ड स्पोर्टस क्लबले विजयी सुरुवात गरेको छ । न्यू डायमण्डले नेपाल आर्मीलाई ३-१को सेटमा पराजित गरेको हो ।
न्यू डायमण्डले केही विदेशी खेलाडीका साथ मैदानमा आर्मीलाई खेलमा पहिलो सेटबाट नै दबावमा राख्दै २५–१७, दोश्रो सेट २५–२२ ले जित्दा तेश्रो सेट भने २५–१३ ले गुमाउन पुगेको थियो । तर चौथो सेटमा २५–१७ ले खेलमा फर्किदै डायमण्ड विजयी बन्यो । उक्त खेलमा न्यू डायमण्डकी प्रतिभा माली म्यान अफ दि म्याच भइन् भने आर्मीकी सलिना श्रेष्ठ उत्कृष्ट डिफेण्डर भइन् ।
यस्तै एपिएफले आफ्नो चिर परिचित प्रतिद्वन्दी नेपाल पुलिसलाई ३–१ को सेटमा पराजित गरेको छ । पहिलो दुई सेट २६–२४ र २५–१८ ले जितेको एफिएफले तेश्रो सेट भने २३–२५ ले गुमाएको थियो । चौथो सेटमा एपिएफले २५–२३ ले जित्दै अंक बटुल्न सफल भएको हो । खेलमा एपिएफकी सरस्वती चौधरी म्यान अफ दि म्याच भइन् । नेपाल पुलिसकी शान्तीकला तामाङ उत्कृष्ट डिफेण्डर घोषीत भइन् ।
पुरुषतर्फको प्रतिस्पर्धामा डिफेण्डिङ च्याम्पियन गण्डकी प्रदेश विजयी भएको छ । गण्डकीले सशस्त्र प्रहरीवल (एपिएफ) क्लवलाई ३–० को सोझो सेटमा पराजित गरेको हो । पहिलो सेट २५–१७ ले जितेको गण्डकीले दोश्रो सेट २५–२२ र तेश्रो सेट २५–१७ ले आफ्नो पक्षमा पार्न सफल भयो । उक्त खेलमा गण्डकीका हिमाल सुनारी मगर म्यान अफ दि म्याच हुँदै नगद ५ हजार हात पारेका छन् भने एफिएफका विनोद चन्द उत्कृष्ट डिफेण्डर घोषित भएका छन् ।
अर्को खेलमा नेपाल पुलिस क्लवले टिप–टप हेल्प नेपाललाई ३–२ ले पराजित गरेको छ । भारतिय ३ जना खेलाडी सम्मिलित हेल्प नेपालले पहिलो सेट २५–१६ ले, दोश्रो सेट ३१–२९ ले जित्दै नेपाल पुलिसलाई दवावमा राखेको थियो । तर नेपाल पुलिसले पछिल्ला तिन सेटमा खेलमा फर्किदै राउण्ड रोविन लिगको पहिलो खेल आफ्नो पक्षमा पार्न सफल भएको थियो । पुलिसले तेश्रो, चौथो र पाँचौ सेट २५–१९, २५–२३ र १७–१५ ले जितेको थियो । उक्त खेलमा हेल्प नेपालका भारतिय खेलाडी अमित म्यान अफ दि म्याच र नेपाल पुलिसका भिम राना मगर उत्कृष्ट डिफेण्डर घोषित भएका छन् ।
राउण्ड रोविन लिगको आधारमा सञ्चालन भएको प्रतियोगितामा महिला र पुरुष गरी १० टिमको सहभागिता छ । प्रतियोगितामा महिला तर्फ विभागिय टिमहरुमा नेपाल आर्मी क्लव, नेपाल पुलिस र शसस्त्र प्रहरीबल, न्यू डायमण्ड र आयोजक संस्था टाइगर ग्रुप अफ पोखरा नेपाल रहको छ । आयोजकको टिममा नेपाल महिला भलिबलकी क्याप्टेन अरुणा शाहीको नेतृत्वमा श्रीलंकका महिला भलिबलका क्याप्टेन सहित ३ जना खेलाडीहरूको सहभागिता रहेकोछ । त्यस्तै पुरुषतर्फ गण्डकी प्रदेश, विभागिय टिमहरू नेपाल आर्मी क्लव, नेपाल पुलिस क्लव र शसस्त्र प्रहरीवल, टिप टप हेल्प नेपाल स्पोर्टस क्लवको टिम रहेका छन् ।
प्रतियोगिताको उपाधि विजेता महिला/पुरुष उपाधी विजेता टिमलाई समान नगद ३/३ लाख, उपविजेता महिला/पुरुष टिमलाई समान नगद १ लाख ५० हजार, तेश्रो हुने महिला/पुरुष टिमलाई समान नगद ७५ हजार र सान्त्वना हुने महिला÷पुरुष टिमलाई नगद ३५ हजार प्रदान गर्ने आयोजकले जनाएको छ । यसै गरी महिला तथा पुरुषतर्फ उत्कृष्ट एक–एक खेलाडीलाई समान नगद रु. २५/२५ हजार तथा हरेक विद्याका उत्कृष्ट खेलाडीहरुलाई नगद जनही नगद १०/१० हजारसहित र ट्रफीद्वारा सम्मान गरिनेछ ।
प्रतियोगिताको उद्घाटन गर्दै गण्डकी प्रदेशका मुख्य मन्त्री कृष्णचन्द्र नेपाली पोखरेलले पोखरालाई खेलकुदको हवको रुपमा विकास गर्ने गरी कार्यक्रम ल्याउने बताए । प्रदेशको समृद्धी खेलकुद र पर्यटनको विकास बाटनै सम्भव भएको मन्त्री पोखरेलले बताए । कार्यक्रममा गण्डकी प्रदेशका खेलकुदमन्त्री राजिव गुरुङ लगायतले प्रदेशको खेलकुद विकासमा जोड दिएका थिए ।
प्रतिक्रिया दिनुहोस !
