काठमाडौं : इङ्ल्यान्डले यसपाली विश्वकप जित्ने हो भने, बुधबार मध्यराति क्रोएसियाविरुद्धको खेल कसैले बिर्सने छैनन् । किनभने थोमस टुचेलको नेतृत्वमा रहेको इङ्ल्यान्डको च्याम्पियन हुने बाटो यहीँबाट सुरु हुने हो । एटी एन्ड टी रंगशालामा हुने समूह ‘एल’को यो खेल नेपाली समयअनुसार १:४५ बजे हुनेछ ।
इङ्ल्यान्डको पछिल्लो विश्वकप उपलब्धि १९६६ मा आएको होइन । उमेर समूहमा यु-१७ र यु-२० टोलीले सन् २०१७ मा विश्वकप उपाधि उचालेको थियो । तर, सिनियरतर्फ टोलीले उपाधिका लागि संघर्ष गरिरहनु परेको छ । ६० वर्ष भइसक्यो, इङ्ल्यान्डले अन्तर्राष्ट्रिय उपाधि नजितेको ।
यदि विश्वकप ट्रफी छनोट प्रतियोगितामा सबैभन्दा राम्रो टोलीलाई दिने हो भने इङ्ल्यान्डले विजयी जुलुस निकालिसक्थ्यो । किनभने इङ्ल्यान्ड युरोपबाट सबैभन्दा छिटो अमेरिकाको टिकट काट्ने टोली बनेको थियो । प्रारम्भिक छनोटमा इङ्ल्यान्डले सबै आठ खेल जितेको थियो । अनि ती सबै खेलमा क्लिन सिट पनि राख्न सफल भयो ।
तर, विश्वकपको पूर्वसन्ध्यामा भएका मैत्रीपूर्ण खेलहरु भने इङ्ल्यान्डका लागि विर्सनलायक रह्यो । उरुग्वेसँग बराबरीमा रोकिएको टोली जापानसँग १–० ले स्तब्ध बन्यो । इङ्ल्यान्डले कुनै पनि एसियाली मुलुकसँग हार बेहोरेको यो नै पहिलोपटक थियो । तर, त्यसपछि न्यु जिल्यान्ड र कोस्टारिकासँग जितले ह्यारी केनको कप्तानी रहेको टोलीमा विश्वकपअघि कन्फिडेन्स दिने काम गर्यो ।
कोस्टारिकाविरुद्ध टुचेलले बलियो पहिलो रोजाई मैदानमा उतारेको थियो । त्यही कारण पनि ३-० को सहज जित सम्भव भएको थियो । यद्यपि थ्री लायन्सले पछिल्ला आठमध्ये सात संस्करण आफ्नो पहिलो खेलमा हार बेहोरेको छैन । सन् २०१४ मा टोली इटालीसँग २-१ ले पराजित भएको थियो ।
टोलीले सातमध्ये चार खेल जितेको छ भने बाँकी तीन खेल बराबरीमा टुंगिएको छ । पछिल्ला दुई संस्करण भने टोलीले क्रमशः ट्युनिसिया र इरानलाई हराएको थियो । तर, विश्वकको इतिहासले इङ्ल्यान्डलाई त्यति ‘फेबर’ गरेको देखिँदैन ।
विश्वकपमा अहिलेसम्म पनि क्रोएसियालाई उपाधिको दाबेदारका रुपमा गनिदैन । तर, टोलीले पछिल्ला दुई संस्करण लगातार मेडल जितेको छ । रसिया २०१८ मा उपविजेता क्रोएसियाले कतार २०२२ मा कांस्य पदक जितेको थियो । लगत्तैको वर्ष २०२२-२३ मा टोलीले नेसन्स लिगमा पनि मेडल प्राप्त गर्यो ।
यद्यपि ज्लात्को ड्यालिकको नेतृत्वमा रहेको क्रोएसियालाई यसपाली मेडलको दाबेदार भनेर भनिहाल्न मिल्दैन । किनभने क्रोएसिया युरोपियन च्याम्पियनसिप २०२४ मा समूह चरणबाटै बाहिरिएको थियो । टोलीले एक खेल पनि जितेन । यो क्रोएसियाका लागि २००६ यताकै सबैभन्दा खराब अन्तर्राष्ट्रिय प्रतियोगिता थियो ।
क्रोएसिया अनुभवी स्कवाडका साथ अमेरिका पुगेको छ । केही चर्चित खेलाडी अहिले करिअरको उत्तरार्धमा छ । तर, यसो भनिरहँदा क्रोएसियाका लागि छनोट प्रतियोगिता इङ्ल्यान्डको जस्तै सम्झनलायक रह्यो । टोलीले आठ खेलमा मात्र दुई अंक गुमायो ।
इङ्ल्यान्ड जस्तै क्रोएसियाका लागि पनि प्रि वल्र्डकप फ्रेन्ड्ली त्यति खास रहेन । ब्राजिल र बेल्जियमसँग हारेको क्रोएसियाले स्लोभेनियाविरुद्ध २-१ को संघर्षपूर्ण जित निकाल्यो । स्लोभेनियारुद्ध इन्जुरी समयमा मारियो पासालिकले गोल गर्दै टोलीलाई जित दिलाएका थिए ।
क्रोएसिया ‘लेट गोल’मा रमाउने टोली हो । रसिया २०१८ को सेमिफाइनलमा मारियो मान्जुकिचले १०९औं मिनेटमा इङ्ल्यान्डविरुद्ध निर्णायक गोल गरेका थिए ।
इङ्ल्यान्डमा अहिले इन्जुरीको समस्या छैन । तर, राइट विंगर बुकायो साकाको फिटनेश टुचेलका लागि टाउको दुखाईको विषय बनिरहेको छ । आर्सनलका साका अहिले फिट नरहेको बुझिएको छ । साकाको ठाउँमा टुचेलले उनका आर्सनल सहकर्मी नोनी माडुवेकेलाई खेलाउने सम्भावना बलियो छ । लेफ्ट साइडमा बार्सिलोनाका नयाँ साइनिङ एन्टोनी गोर्डन हुने अनुमान गरिएको छ ।
क्रोएसियसँग पनि विकल्पहरु धेरै छन् । लुका मोड्रिच र इभान पेरिसिच ‘प्लेयर्स टु वाच’ हुन् । पेरिसिचका लागि गत सिजन एकदमै राम्रो रह्यो । पिएसभीले गरेका २६ गोलमा उनको संलग्नता रह्यो । यो खेल लगत्तै समूह ‘एल’को अर्को भिडन्तमा घाना र पानमाले एकअर्कासँग प्रतिस्पर्धा गर्नेछ । खेल बिहीबार बिहान ३:४५ बजे हुनेछ ।
प्रतिक्रिया दिनुहोस !
