ढल्केवर(धनुषा) : धनुषामा एक महिनाको अवधिमा ९ वटा बालविवाह रोकिएको छ । माघ १२ गतेदेखि फागुन १५ गतेसम्ममा जिल्लाभित्र ९ वटा बालविवाह रोकिएको धनुषा प्रहरीले जनाएको छ । गोप्य सूचनाको आधारमा बाल बालिकाको अभिभावक, न्यायिक समिति, नागरिक समाज, विभिन्न महिला समूहलगायत तथा संघसंस्थासँगको समन्वयमा प्रहरीले ९ वटा बालविवाह रोकेको धनुषा प्रहरी प्रवक्ता एवं डीएसपी जितेन्द्र बस्नेतले जानकारी दिए ।
उनका अनुसार एक महिनाको अवधिमा उमेर नपुगेका धनुषाको विदेह नगरपालिकामा तीन र शहिदनगर नगरपालिकामा,धनुषाधाम नगरपालिका, लक्ष्मीनिया गाउँपालिका, सबैला नगरपालिका, क्षीरेश्वरनाथ नगरपालिका, जनकपुरधाम उपमहानगरपालिकामा एक–एक गरी ९ वटा बालविवाह रोकिएको हो ।
धनुषालगायत मधेशमा बढ्दै गएको बाल विवाहका घटना रोक्न प्रहरी प्रशासनले आफ्नो सक्रियता बढाएको छ । जिल्लामा सामुदाय–प्रहरी साझेदारी कार्यक्रमअन्तर्गत पछिल्लो समय गाउँगाउँमा सचेतना अभियान चलाउँदै आएको डीएसपी बस्नेत बताउँछन् ।
समाजमा समाजिक तथा परम्परागत कुरीतिको रुपमा जडा गाडेको बालविवाह न्यूनीकरणमा जनचेतनाको अभाव भएको महिला अधिकारकर्मी वीणा कडारीको बुझाइ छ । मुलुकी अपराध संहिता, २०७४ मा बालविवाहको कसुर गर्ने गराउने व्यक्तिलाई तीन वर्षसम्म कैद र ३० हजार रुपैयाँसम्म जरिवाना हुनसक्ने कानूनी व्यवस्था छ ।
प्रतिक्रिया दिनुहोस !
