भैरहवा : आज होली अर्थात फागु पूर्णिमा तराईका विभिन्न जिल्लाहरुमा हर्षोल्लासका मनाइएको छ। पहाडि र हिमाली क्षेत्रमा मनाइएको भोलिपल्ट तराईमा होली मनाउने गरिन्छ । कोरोना संक्रमणका कारण विगतका वर्षमा हर्षोल्लासका साथ होली मनाउन नपाएका सर्वसाधरणहरु यस वर्ष भने झुमेर पर्व मनाए।
भैरहवाको विभिन्न स्थानको चोकमा सांगीतिक कार्यक्रम गर्दै तथा एक आपसमा मित्रता, आत्मीयता, र सद्भाव दर्शाउन साथी भाइहरुलाई अबिर तथा रङ लगाइ होली पर्व मनाइयो। होली पर्वलाई सदभावपूर्ण बनाउनका लागि रुपन्देही जिल्लामा सुरक्षा व्यवस्था कडा पारिएको छ । जिल्लाको चोक–चोकमा सुरक्षाकर्मी तैनाथ छन्।
जिल्लाभरी पिकेट, मोबाइल गस्ती, ठाउँठाउँमा चेकिङ प्वाइन्ट, प्रहरीका टिमहरु विभाजन गरी खटाइएको जिल्ला प्रहरी कार्यालय रुपन्देहीका प्रहरी नायब उपरीक्षक नवरत्न पौडेलले जानकारी दिए । होली पर्वलाई लक्षित गरी जिल्लाभर करिब आठ सय प्रहरी परिचालन गरिएको उनले बताए । उनका अनुसार हालसम्म जिल्लामा कुनै अप्रिय घटना घटेको छैन । कसैको इच्छा विपरित लोला हान्ने, रङ लगाउने, ट्राफिक नियमको उल्लंघन, मादक पदार्थ सेवन गरेर होहल्ला, झैझगडालगायत जस्ता क्रियाकलाप गर्नेहरुलाई पक्राउ गरी कारबाही गर्ने रुपन्देही प्रहरीले जनाएको छ ।
कोरोना संक्रमणका कारण स्वास्थ्य मापदण्ड अपनाएर होली पर्व मनाउन जिल्ला प्रशासन कार्यालय रुपन्देहीले सर्वसाधरणलाई आग्रह गरेको छ ।
प्रतिक्रिया दिनुहोस !
