नुवाकोट : स्थानीय तह निर्वाचन २०७९ का लागि नुवाकोटका मतदान केन्द्रमा सबै कर्मचारीहरु परिचालन गरिसकिएको छ। नुवाकोटमा कायम मतदान केन्द्रमध्ये १० मतदान केन्द्रमा महिला कर्मचारीमात्रै खटाइएको छ।
१२ स्थानीय तह रहेको नुवाकोटमा १ सय ३२ मतदानस्थलमा २ सय ८७ मतदान केन्द्र कायम रहेका छन्। तिमध्ये १० स्थानीय तहका एक/एक मतदान केन्द्रलाई नमूनाको रुपमा छनौट गरी ती मतदान केन्द्रहरुमा महिलामात्र कर्मचारी छनौट गरिएको जिल्ला निर्वाचन कार्यालय नुवाकोटले जनाएको छ।
यस्तै तादी गाउँपालिकाको रालुका मावि ‘क’, तारकेश्वरको आर्युवेद स्वास्थ्य भवन ‘क’, पन्चकन्याको देवकीधरम मावि ‘क’, म्यागङको देउराली मावि ‘क’ र लिखुको नेपाने मावि ‘क’ मतदान केन्द्रलाई नमूना केन्द्रकोरुपमा महिला कर्मचारीमात्रै खटाइएको अधिकृत गौतमले जानकारी दिए। उनका अनुसार ति मतदान केन्द्रहरुमा मतदान अधिकृत, सहायक मतदान अधिकृत, सहायक कर्मचारी तथा कार्यालय सहयोगीसममेत महिलामात्रै खटाइएको छ।
नुवाकोटमा महिला १ लाख १५ हजार २९ जना र पुरुष १ लाख २२ हजार चारसय दुई जना र ३ जना तेश्रो लिंगीसहितगरी कुल मतदाता संख्या २ लाख ३७ हजार ४ सय ३४ जना रहेका छन्। नुवाकोटमा स्थानीय तह निर्वाचन २०७९का लागी ६ वटा राष्ट्रिय मान्यता प्राप्त दल रहेका छन्।
यसका साथै आयोगले तोकेको अवधि भित्र जिल्लामा क्रियाशिल रहेका दलको जिल्ला कार्य समितिको विवरण बुझाएका २२ वटा दलहरु गरी २८ वटा राजनीतिक दलहरुको आफ्नै निर्वाचन चिन्ह मतपत्रमा उल्लेख रहेको छ। नुवाकोटमा मझौला आकारको ३८ लहरको मतपत्र रहेको छ।
प्रतिक्रिया दिनुहोस !
