निर्वाचन स्थगित भएको धनकुटाको सहिदभूमि गाउँपालिकामा ३ केन्द्रको मतदान सुरु
जेठ २, २०७९ सोमबार १०:३१:०
धनकुटा : गत वैशाख ३० गते शुक्रबार मतदान प्रक्रियामा नेकपा एमाले र गठबन्धनका प्रतिनिधिबीच विवाद हुँदा स्थगित भएको सहिदभूमि गाउँपालिका वडा नं. ६ को तीनवटा केन्द्रमा आज मतदान सुरु भएको छ ।
सो वडाको ठाकुरदेवी माध्यमिक र ६ नं. वडा कार्यालयको तीनवडा मतदान केन्द्रमा बिहान ७ बजेदेखि मतदान काइ भइरहेको निर्वाचन अधिकृत रुद्रमणी गिरीले बताए ।
विवादको कारण गत शुक्रबार बिहान साढे ११ बजेदेखि यस केन्द्रमा मतदान प्रक्रिया रोकिएको थियो । अशक्त, असहाय, तथा ज्येष्ठ मतदाताहरुको तर्फबाट एउटै व्यक्तिले पटक–पटक मतदान गरेको विषयमा विवाद भएको थियो ।
विवादले मतदान कार्य अवरुद्ध हुँदा पटकपटक सर्बदलीय बैठक राख्दा समेत बेलुका ५ बजेसम्म पनि विवादको निरुपण हुन सकेको थिएन । सहिदभूमि निर्वाचन कार्यालयले विवादकाबीच मतदान कार्य सञ्चालन गरे थप भौतिक क्षति समेत हुने निष्कर्ष निकाली मतदान प्रक्रिया स्थगित गरेको थियो ।
तीन केन्द्रमा २५ सय १३ मतदाता रहेका छन् । मतदान प्रक्रिया स्थगित हुनुपूर्व ८ सय १२ मत खसेको थियो । सो दिन खसेको मतलाई रद्द गरिएको छ । पुन सुरुदेखि नै मतदान कार्य भइरहेको छ । अहिले शान्तिपूर्ण तरिकाले मतदान भइरहको उनले बताए ।
मतदान केन्द्रको सुरक्षा व्यवस्थालाई कडाई गरिएको छ । पुनमतदान लागि नयाँ कर्मचारी खटाइएको छ । पुरानो कर्मचारीको सेट परिवर्तन गरिएको उनले बताए । साँझ ५ बजे भित्र मतदान कार्य सम्पन्न गरी दलका प्रतिनिधि तथा उम्मेदवासँग सर्बदलीय बैठक भएपछि मतगणना सुरु हुने उनको भनाइ छ ।
पिप्लेस्थित सहिदभूमि गाउँपालिकाको कार्यालय रहेको भवनको माथिल्लो तलामा मत गणनाको व्यवस्था गरिएको छ । सम्भवत बेलुकादेखि नै मत गणना हुने जानकारी दिइएको छ । निर्वाचन आयोग र मुख्य निर्वाचन अधिकृत सँगको समन्वयमा नयाँ मिति तोकिएको थियो ।
सहिदभूमि गाउँपालिकाको अध्यक्षमा गठबन्धनको तर्फबाट एकीकृत समाजवादीका जेवी राई र नेकपा एमालेको तर्फबाट निवर्तमान अध्यक्ष मनोज राई उम्मेदवार छन्।
प्रतिक्रिया दिनुहोस !
