लहान नगरपालिका २४ मा जसपाका रासलाल प्यानलसहित विजयी
सिरहा : लहान नगरपालिका २४ बाट जनता समाजवादी पार्टी (जसपा) का रासलाल राय राजपुत प्यानलसहित विजयी भएका छन् ।
उनले नेकपा एमालेका उम्मेदवार कमलदेव यादवभन्दा ८७६ मत बढी प्राप्त गरेका छन् । रायले १६७८ मत पाउँदा यादवले ८०२ मत प्राप्त गरेका छन् ।
नवनिर्वाचित राय उम्मेदवारी दर्ताको दिनसम्म कांग्रेस नगरसभापति थिए । वडादेखि क्षेत्रीय संसदीय समितिले उनै रायलाई वडाअध्यक्षको उम्मेदवार बनाउने निर्णय गरेको थियो। वैशाख ११ गते क्षेत्रीय सभापति महेश चौधरीले उनलाई टिकट पनि दिए ।
तर, त्यसको केही घण्टाभित्रै जिल्ला सभापति रामचन्द्र यादवको घरबाट पूर्वमन्त्री कांग्रेस केन्द्रीय सदस्य चित्रलेखा यादवले आफ्ना आफन्त पर्ने विरेन्द्र यादवलाई जर्बजस्ती अर्को टिकट बाँडिन् ।
एउटै वडामा दुईजनालाई टिकट दिएपछि कांग्रेसमा विवाद बढ्दै गयो । कसको उम्मेदवारी सदर हुने ? कसको बदर हुने बहस चल्यो । रायले विभिन्न व्यक्तिहरुसँग सल्लाह लिए । निर्वाचन समितिले पनि यस्तो अवस्थामा पार्टीले आधिकारिक पत्र पठाएको व्यक्ति सदर हुने जनाएपछि राय अल्मल्लमा परे ।
रायलाई हजारौं स्थानीय कार्यकर्ताले जसरी पनि चुनाव लड्नै पर्ने दबाब दिए । उनले वैशाख १२ गते पत्रकार सम्मेलन गरे । कांग्रेस जिल्ला सभापति रामचन्द्र र केन्द्रीय सदस्य चित्रलेखा यादवलाई त्यहीबाट विवाद सुल्झाउन अल्टिमेटम दिए । तर, उनको कुरा सुनिएन ।
उनको कुरा नसुन्नुमा कारण थियो केही महिनाअघि मात्रै जिल्ला अधिवेशन । राय नेता रामसुन्दर चौधरी पक्षमा लागेको थियो । अधिवेशनमा मतदानको बेला विवाद भयो । धाँधली भएको भन्दै चौधरी पक्ष पुनः मतदानको माग गर्यो । त्यसको कुनै सुनुवाइ भएन । राय चौधरीको पक्षमा लागेकै रिस नेताहरुले उनीमाथि पोख्दै टिकट काटेका थिए।
राय निकटका नेताहरुका अनुसार स्वतन्त्र उम्मेदवारी दिने कि भन्नेबारे छलफल भयो । त्यहाँ वडा अध्यक्ष र वडा सदस्यहरुको चिन्ह फरक पर्ला कि भन्ने कुरा चल्यो । त्यसपछि उनी जसपामा प्रवेश गरेर चुनाव लड्ने निर्णयमा पुगे।
किनभने यो वडामा ०७४ को निर्वाचनमा तत्कालिन फोरम र राजपाका उम्मेदवारले करिब ५ को हराहरीमा मत ल्याएका थिए ।
राय वैशाख १२ गते उम्मेदवारीकै दिन जसपा प्रवेश गरे । टिकट लिए र चुनाव लडे । अधिकांश कांग्रेस कार्यकर्ताहरु रासलाल रायलाई जिताउन खटे । वडा अध्यक्षमा प्यानसहित उनी विजयी भए ।