बुढीगंगा नगरपालिकामा निर्वाचन : १० वडामध्ये ७ एमाले, ३ मा कांग्रेस विजयी
असार २६, २०७९ आइतबार १२:१७:०
बाजुरा : बुढीगंगा नगरपालिकाको मेयर र उपमेयरमा नेकपा एमालेका उम्मेदवार विजयी भएका छन् ।
नगर प्रमुखमा रामबहादुर बानियाँ र नगर उप-प्रमुखमा माया कुमारी खड्का (कुवँर) विजयी भएका हुन्।
दुवैजनाले गठबन्धनका उम्मेदवारलाई हराउँदै नगर प्रमुख र उपप्रमुखमा विजयी भएका हुन् ।
नगर प्रमुखका उम्मेदवार बानियाँले ४ हजार ७ सय ७७ मत प्राप्त गरी विजयी भएका हुन् भने उपप्रमुख कुवँरले ४ हजार ७ सय २७ मत प्राप्त गरी निर्वाचित भएकी हुन्।
उनका निकटतम प्रतिद्वन्द्वी नेपाली कांग्रेसका नगर प्रमुख रङ्गबहादुर खातीले ३ हजार ७ सय ७४ मत ल्याए पराजित भए । कांग्रेसका उपप्रमुखकी उम्मेदवार रिता शाहीले ३ हजार ७ सय ५५ मत प्राप्त गरिन्।
विजयी नगरप्रमुख बाँनिया र उपप्रमुख कुँवर २०७४ सालको स्थानीय तह निर्वाचनमा सोही पदमा कांग्रेससँगै पराजय भएका थिए ।
यसपटक कांग्रेसले दुबै पदमा नयाँ अनुहारलाई टिकट दिएको थियो भने एमालेले २०७४ सालका उम्मेदवारलाई टिकट दिएको थिए ।
१० वडा रहेको बुढीगंगा नगरपालिकामा ७ वडामा नेकपा एमालेका वडा अध्यक्षका उम्मेदवार विजयी भएका छन् ।
नेपाली कांग्रेस भने ३ वडामा सिमित भएको छ । वडा १, २, ३, ५, ६, ९ र १० मा नेकपा एमालेका उम्मेदवारहरु विजयी भएका छन् । वडा नम्बर ४, ७ र ८ मा नेपाली कांग्रेस विजयी भएको हो । २०७४ मा ६ वडा जितेको एमालेले यस पटक भने ७ वडा जितेको हो।
बुढीगंगा नगरपालिकमा एमालेबाट वडा नम्बर- १ मा रणबहादुर थापा, २- मा पदमबहादुर भण्डारी, ३ मा खडकबहादुर अधिकारी विजयी भएका छन् । यस्तै, ५ मा चक्रबहादुर थापा, ६ मा हेमराज जैशी, ९ मिनबहादुर सिंह र १० मा दलबहादुर साउँद विजयी भएका छन् ।
त्यस्तै, ४- मा नेपाली कांग्रेसबाट वडा अध्यक्षका उम्मेदवार मीनबहादुर शाह, ७ -मा भुवनसिहं केसी र ८- मा रमेशबहादुर रावल विजयी भएका छन् ।
बुढीगंगामा १३ हजार ६ सय ५९ मतदाता रहेका छन् । कूल मतदाताको ६६.८३ प्रतिशत अर्थात् ९ हजार १ सय २८ मत खसेको जिल्ला निर्वाचन अधिकारी नवराज अवस्थीले बताए। ।
बैशाख ३० गते भएको निर्वाचनमा भने ७५.५८ प्रतिशत मत खसेको थियो । पछि विवादका कारण निर्वाचन स्थगित भएको थियो।
बुढीगंगा नगरपालिकामा रहेका १० वटा मतदान स्थलमा नेपाल प्रहरी, शसस्त्र प्रहरी, नेपाली सेना र राष्ट्रिय अनुसन्धान गरि एउटा स्थलमा एक सयभन्दा बढी सुरक्षाकर्मी परिचालन भएका थिए । मतदान स्थलको सुरक्षा नेतृत्व नेपाल प्रहरी, शसस्त्र प्रहरीका अधिकृतले गरेका थिए ।
बैशाख ३० मै निर्वाचन भएको बुढीगंगा नगरपालिकामा विवादका कारण पुन: मतदान गर्ने निर्वाचन आयोगले निर्णय गरेको थियो ।
त्यतिबेला १० वडामध्ये ६ वडामा विवाद भएको थियो । वडा नं. २, ३, ४, ५, ७ र ९ का केन्द्रमा मतदान निस्पक्ष नभएको भन्दै स्थानीयले विरोध जनाएका थिए।
२, ३, ५ र ९ वडाका मतदानस्थल एमालेका कार्यकर्ताले नियन्त्रणमा लिएका थिए भने वडा ४ र ७ मा कांग्रेसका कार्यकर्ताले नियन्त्रणमा लिएर आफू अनुकूल मतदान गराएका थिए । यी ६ वटै वडाका मतदानस्थलमा झडप, उम्मेदवारमाथि कुटपिट र मतदाता लखेटिएका थिए ।
नगरपालिकाको वडा नम्बर ४ मा भने बुथ कब्जा गरेर ९९ दशमलव ४१ प्रतिशतसम्म मत खसाइएको थियो । एमालेले कब्जा गरेको भनिएका २, ३, ५ र ९ मा प्रहरीले मतेपटिका मतदान केन्द्रमै छाडेर हिँडेका थिए ।
बुढीगंगाको विवाद अध्ययन गर्न निर्वाचन आयुक्त सगुनशमशेर जबरासहितको टोलीले स्थलगत अध्ययन गरेको थियो। निर्वाचन आयोगले चुनावस्थित गरेर पुन: निर्वाचन गर्ने निर्णय गरेको थियो ।
प्रतिक्रिया दिनुहोस !
