राष्ट्रपति रनिङ्ग शिल्डको उपाधी रुपन्देही लिलाराम माध्यमिक विद्यालयलाई

भैरहवा :रुपन्देहीको सिद्धार्थनगर नगरपलिकाद्वारा आयोजित नगरस्तरीय दोस्रो राष्ट्रपति रनिङ्ग शिल्ड प्रतियोगिताको उपाधी रुपन्देही लिलाराम न्यौपाने माध्यमिक विद्यालयले चुमेको छ । यससँगै विद्यालय यो दोस्रो पटकको प्रतियोगिताको उपाधी पनि चुम्न सफल भएको छ ।

पक्लिहवा कृषि क्याम्पसको खेल मैदानमा तीन दिनसम्म सञ्चालन भएको प्रतियोगिताको विभिन्न खेलमा नौ स्वर्ण,नौ रजत र सात कास्य गरी कूल २५ पदक प्राप्तीसँगै लिलारामले राष्ट्रपति रनिङ्ग शिल्डको उपाधी चुमेको रुपन्देही जिल्ला खेलकुद विकास समितीका मुख्य प्रशिक्षक उमेश थापाले बताए ।

उनका अनुसार साई ग्लोबल माध्यमिक विधालयले पाँच स्वर्ण,चार रजत ,दुई कास्य गरी कूल एघार पदकको प्राप्त गरी द्वितीय र तीन स्वर्ण,तीन रजत र पाँच कास्य गरी कूल एघार पदकसहित जेसिज माध्यमिक विद्यालय तृतीय भएको छ ।

समापन समारोहमा विजेताहरूलाई स्वर्ण,रजत र कास्य पदक सिद्धार्थनगर नगरपालिकाका प्रमुख इश्तियाक अहमद खान,उपप्रमुख उमा अधिकारी,प्रमुख प्रशासकीय अधिकृत नवराज पौड्यालले प्रदान गरेका थिए । सोही अवसरमा दोस्रो अन्तरपालिका कर्मचारी स्तरीय फुटबल प्रतियोगितामा सिद्धार्थनगर नगरपालिकाको कार्यालय द्वितीय भएकोमा खेलमा सहभागी कर्मचारी खेलाडी र व्यवस्थापकलाई पनि नगरपालिकाको कार्यालयले सम्मान गरेको छ ।

यस्तै मलेसियामा सञ्चालित सरावाक बोर्नियो कप इन्टरनेसनल तेकवान्दो च्याम्पियनसिपको पुरुषतर्फ ८० र ८७ केजी तौल समूह माथिको खेलमा स्वर्ण पदक सिद्धार्थनगर वडा नम्बर ८ का खेलाडीद्वय अभिषेक बराल र आशुतोष बराललाई प्रशंसा पत्रसहित सम्मान गरिएको छ ।

 कार्यक्रमलाई सम्बोधन गर्दै सिद्धार्थनगर नगरपालिकाका प्रमुख इश्तियाक अहमद खानले सिद्धार्थनगर खेलाडीको उर्वर भूमि रहेको भन्दै आफूहरूले खेल क्षेत्रलाई प्राथमिकतामा राखेर काम गरिरहेको र गर्दै जाने बताए । उनले स्वास्थ्यका लागि खेलकुद आवश्यक रहेकाले खेल क्षेत्रको विकास आवश्यक रहेको बताए ।

उनले सेवा सुविधाको अभावमा खेलाडीहरूले अन्तराष्ट्रिय स्तरमा उत्कृष्ट खेल प्रर्दशन गरी राज्यको सम्मान अभिवृद्धि गर्नमा सहयोग पुर्‍याउँदै आएपनि राज्यले चाहे जति गर्न नसके पनि आफूहरूले सकेसम्म सहयोग गर्ने बताए ।

सिद्धार्थनगर नगरपालिकाको उपप्रमुख उमा अधिकारीले प्रत्येक विधालयले खेलकुद प्रशिक्षक र खेलकुद कक्षा सञ्चालन गर्नुपर्ने बताउँदै सुधारका कार्यहरु विद्यालयले आफैबाट सुरु गर्नु पर्ने जनाइन् । उनले खेलाडीमाथि राजनीति गर्न नहुने भन्दै आफूहरूले माया गर्ने गरेको बताइन् । ‘विद्यालय आफूले गर्नुपर्ने कर्तव्य पुरा गरेर सुरुवात गरोस्, हामीले के गर्नुपर्ने हो त्यो गर्न तयार छौँ,'उनले भनिन् । 

प्रतियोगितामा छात्र–छात्रातर्फ भलिबल,कबड्डी,एथलेटिक्स र मार्सल आर्ट खेल भएको सिद्धार्थनगर नगरपालिकाका शिक्षा अधिकृत जाह्नवी पाण्डेयले बताइन् । उनका अनुसार एथलेटिक्स अन्र्तगत छात्र र छात्रातर्फ एक सय,दुई सय,चार सय, आठ सय, एक हजार पाँच सय, तीन हजार मिटर दौड साथै चार गुणे एक सय , चार गुणे चार सय मिटर रिले दौड भएका थिए ।

त्यस्तै छात्रा र छात्रा तर्फ हाइजम्प, लङजम्प, त्रिपलजम्प, ज्याभलिङ थ्रो,सटफुट खेल प्रतियोगिता सम्पन्न भएको थियो । यस्तै मार्शल आर्ट अन्र्तगत तेक्वान्दो खेलको छात्रा तर्फ ४२ केजी तौल समूह मुनि, ४४ केजी मुनि, ४६ केजी मुनि र छात्रतर्फ ४५ केजी, ४८ केजी, ५१ केजी तौल समूह मुनि खेल भएको थियो । सो अवसरमा प्रर्दशनको रुपमा कराँते खेल समेत भएको थियो ।