सगरमाथा क्षेत्र छोड्ने पर्यटक बढे, लुक्लामा हवाई टिकेट लिनेको चाप
![सगरमाथा क्षेत्र छोड्ने पर्यटक बढे, लुक्लामा हवाई टिकेट लिनेको चाप](https://annapurnapost.prixacdn.net/media/albums/Sagarmatha_MWCdJxvrHl_SqHk4dPZwo.jpg)
सोलुखुम्बु : विश्वको प्रमुख पर्यटकीय गन्तव्य सगरमाथा क्षेत्र छोड्ने पर्यटकको संख्या वृद्धी भएको छ । यस वर्ष वसन्तयामको पर्यटक सिजन सकिएसँगै सगरमाथा क्षेत्रबाट बाहिरिने पर्यटकको संख्या बढेको हो ।
सगरमाथा राष्ट्रिय निकुञ्जको तथ्यांक अनुसार पछिल्लो एक हप्तामा २६९ विदेशी र ५५ नेपाली गरी ३२४ जना पर्यटक भित्रिंदा ७९१ विदेशी र २३९ नेपाली गरी १ हजार ३० जना बाहिरिएका छन् । एक महिना अघिसम्म भित्रिने पर्यटकको चाप अधिक रहेको खुम्बुमा अहिले फर्किने पर्यटकको संख्या उच्च रहेको निकुञ्जका सुचना अधिकारी मनोज कुमार मण्डलले बताए ।
नाम्चे, खुम्जुङ, जोरसल्ले लगायतका पर्यटकीय स्थलहरुमा यतिखेर ओरालो झर्ने पर्यटकको ताँती देखिने गरेको नाम्चेका पर्यटन व्यवसायी लामाकाजी शेर्पाले बताए । सगरमाथा क्षेत्रबाट फर्किने पर्यटकको संख्या बढेसँगै लुक्लामा हवाई टिकेटको चाप पनि बढेको छ ।
खुम्बुबाट फर्किने अधिकांश पर्यटकले विमानको प्रयोग गर्ने भएकाले तेन्जिङ हिल्लारी विमानस्थलमा चाप बढेको नेपाल नागरिक उड्ययन प्राधिकरण लुक्लाका प्रमुख महेश श्रेष्ठले बताए । अहिले लुक्लाबाट दैनिक एक दर्जन भन्दा बढी पटक उडान तथा अवतरण हुने गरेका छन् ।
जसमा लुक्ला आउने विमानले कार्गो सामाग्री लिएर आउने गरेका छन् भने काठमाडौं फर्किंदा यात्रु लिएर जाने गरेको प्राधिकरण प्रमुख श्रेष्ठको भनाई छ । खुम्बुमा वर्षको दुई सिजन फागुन अन्तिमदेखि जेठ मध्यसम्म र असोजदेखि मंसिरसम्मलाई मुख्य पर्यटकीय सिजन मानिन्छ ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)