एनआईसी एसिया लघुवित्तको साढे ४ करोड रकम हिनामिना, शाखा प्रमुखसहित ८ जनाविरुद्ध मुद्दा
असार ४, २०८० सोमबार १३:५२:११
जाजरकोट : जाजरकोटको छेडागाड नगरपालिका ५ थलह बजारमा रहेको एनआईसी एसिया लघुवित्त वित्तिय संस्था लिमिटेडका कर्मचारीले नक्कली ऋणी खडा गरेर लाखौं रकम हिनामिना गरेको रहस्य खुलेको छ । थहल शाखाका कर्मचारीहरुले ४ करोड ५३ लाख रुपैयाँ हिनामिना गरेको भन्दै प्रहरीमा मुद्दा परेको छ ।
कर्मचारीले स्थानीयको नाममा नक्कली ऋणी खडा गरी संस्थाको रकम हिनामिना गरेको पीडितले बताएका छन् । करिब २ सय ८५ जना नागरिकको नाममा थलह शाखाका तत्कालीन शाखा प्रमुख सुशील केसीसहित ८ जना कर्मचारीले रकम हिनामिना गरेको आरोप लागेको छ ।
केसीको नेतृत्वमा रहेको कर्मचारी टिमले नक्कली ऋणी खडादेखि ब्याज वापतको रकम हिनामिना गरेको आरोप लागेको हो । नक्कली ऋणी खडा गरेर कर्मचारीले उक्त रकम हिनामिना गरेका हुन् । लघुवित्त संस्थाको केन्द्रीय कार्यालयले अडिट गर्दा उक्त रहस्य खुलेको हो ।
ठूलो रकम हिनामिना भएको कुरा पत्ता लागेपछि एनआईसी एसिया लघुवित्त वित्तिय संस्था लिमिटेड केन्द्रीय कार्यालय बनेपा ७ काभ्रेपलाञ्चोक र शाखा कार्यालय जाजरकोटले तत्कालिन शाखा प्रमुख केसी सहित ८ जना विरुद्ध जिल्ला प्रहरी कार्यालय जाजरकोटमा मुद्धा दर्ता गराएको हो । मुद्धा परेका आठै जना कर्मचारी फरार रहेको प्रहरीले जनाएको छ ।
स्थानीय खातावालाको कागजपत्र लिएर नक्कली ऋणी खडा गरी रकम हिनामिना गरेको बारे अनुसन्धान भइरहेको जिल्ला प्रहरी कार्यालय जाजरकोटले जनाएको छ । मुद्दा परेकाहरूको कर्मचारीको नाम भने प्रहरीले मिडियालाई दिन इन्कार गरेको छ ।
'हामी अनुसन्धानकै क्रममा छौं अहिले नाम सार्वजनिक गर्न मिल्दैन,' जिल्ला प्रहरी प्रमुख सन्तोष रोकामगरले बताए । उनले भने ‘अन्य विवरण पनि अनुसन्धनकै सिलसिलामा रहेकाले कुनै कुरा भन्न मिल्दैन । अनुसन्धान पुरा भएपछि सबै कुरा बाहिर आउँछ । दोषी को हो हामी बुझिरहेका छौं । संस्थाको करिब साढे चार करोड रकम हिनामिना भएपछि ८ जना कर्मचारीविरुद्ध ठगि मुद्दा दर्ता भएको छ ।’
एनआईसी एसिया लघुवित्त बैक केन्द्रीय कार्यालयका सूचना अधिकृत अर्जुन श्रेष्ठले पनि नाम भन्न नमिल्ने बताए । उनले केही सूचना लिने भए संस्थामा निवेदन दिएपछि मात्र पाइने बताए । 'हामीले प्रहरीमा उजुरी दिएका छौं नाम प्रहरीले दिन्छ उतै माग्नुहोस्,' उनले भने ।
प्रतिक्रिया दिनुहोस !
