कपिलवस्तु : कपिलवस्तु कारागारमा रहेका ८ जना कैदी रिहा भएका छन् । संविधान दिवसका अवसरमा गत आर्थिक वर्षसम्म ४०/५० प्रतिशत कैद सजाय भुक्तान गरिसकेका र असल चाल चलन भएका कैदीहरु रिहा भएको कपिलवस्तु कारागारका जेलर मनोज शैनीले जानकारी दिए ।
‘संविधान दिवसको अवसरमा राष्ट्रपतिको सिफारिसमा उनीहरु रिहा भएका हुन्’,जेलर शैनीले भने,‘मुद्दा नकारात्मक सूचीमा नपरेका, असल चाल चलन भएका आधारमा उनीहरुको नाम कारागार व्यवस्थापन विभागमा पठाइएको थियो । सोही आधारमा उनीहरुको कैद राष्ट्रपति कार्यालयबाट मिनाहा गर्ने निर्णय भएर आएपछि उनीहरु रिहाई भएका छन् । ’
रिहा भएकामध्ये ४ जनाले कैद सजायको ४० प्रतिशत कैद भुक्तान गरी सकेका छन् । जसमध्ये ३ जना कर्तव्य ज्यान र १ जना सवारी ज्यान मुद्दामा कैद जीवन बिताइरहेका थिए । बाँकी ४ जनाले भने ५० प्रतिशत कैद सजाय भुक्तान गरी सकेका छन् । जसमा ३ जना कर्तव्य ज्यान मुद्दा र १ जना चोरी मुद्दामा कैद जीवन बिताई रहेको कपिलवस्तु कारागार प्रशासन शाखाले जनाएको छ ।
‘कैदमुक्त भएका उनीहरु बाँकी जीवन आफ्नो घर परिवार र समुदायको हितमा बिताउने प्रतिबद्धतासहित कारागारबाट बिदाई भएर घर फर्किका छन्’,जेलर शैनीले भने।
कपिलवस्तु कारागारमा कुल ५० कैदी बन्दीहरु रहदै आएकोमा ८ जना रिहा भएका छन् ।
प्रतिक्रिया दिनुहोस !
