रघुगंगाले जित्यो राष्ट्रपति रनिङ शिल्ड
बेनी : रघुगंगा गाउँपालिका स्तरीय चौथो राष्ट्रपति रनिङ शिल्ड खेलकुद प्रतियोगिताको उपाधि पिल्लेको रघुगंगा माविले जितेको छ।
झिँमा मंगलबार सम्पन्न प्रतियोगितामा १२ वटा स्वर्ण र ४ वटा कास्य पदकसहित रघुगंगा माविले लगातार चौथो पटक उपाधि जितेको हो। रघुगंगा गाउँपालिका–३ मा रहेको रघुगंगा माविले गत वर्ष लगातार तेस्रो पटक प्रतियोगिता जितेर रनिङ शिल्डलाई आफ्नो बनाएको थियो।
यसैगरी ७ वटा स्वर्ण, ४/४ वटा रजत र कास्य पदक जितेको रघुगंगा गाउँपालिका–२ मा रहेको मुक्तिधाम मावि उपविजेता बनेको छ। तीन वटा स्वर्ण, पाँच/पाँच वटा रजत र कास्य पदक जितेको वडा नम्बर ६ पाखापानीको अमर मावि तृतीय भएको छ।
तीन दिनसम्म सञ्चालन भएको प्रतियोगितामा ११ वटा विद्यालय सहभागी भएका थिए। एथलेटिक्स र भलिबल विधाका खेलमा विद्यार्थीहरूबीच प्रतिस्पर्धा भएको थियो।
विजेतालाई रनिङ शिल्ड, ट्रफी, मेडल र प्रमाणपत्रसहित नगद ५० हजार रुपैयाँ प्रदान गरिएको छ। दोस्रो र तेस्रो हुने विद्यालयलाई क्रमशः नगद ३० हजार र २० हजारको साथमा ट्रफी, मेडल र प्रमाणपत्रद्वारा पुरस्कृत गरिएको छ।