सुर्खेत : राष्ट्रियसभा निर्वाचनका लागि कर्णालीमा ६ जनाको उम्मेदवारी दर्ता भएको छ । आगामी माघ ११ गते हुने निर्वाचनका लागि सत्तारुढ गठबन्धन र नेकपा एमालेका गरी ६ जनाको उम्मेदवारी दर्ता भएको हो । कर्णाली प्रदेश निर्वाचन कार्यालयका अनुसार सत्ता गठबन्धनका ३ र एमालेका ३ जनाले उम्मेदवारी दर्ता गरेका छन् ।
कर्णालीमा अन्य, दलित र महिला कलस्टर गरी ३ पदका लागि निर्वाचन हुँदैछ । जसका लागि सत्ता गठबन्धनबाट नेपाली कांग्रेस, नेकपा माओवादी केन्द्र र नेकपा एकीकृत समाजवादीले १/१ सिटमा उम्मेदवारी दिएका हुन् । गठबन्धनको तर्फबाट सोमबार कांगेसका कृष्णबहादुर रोकाय, माओवादीका बिष्णु विक र एकीकृत समाजवादीका सावित्री मल्लले उम्मेदवारी दर्ता गराएका छन् ।
रुकुमपश्चिमका रोकाया कांग्रेस कर्णाली प्रदेश समितिका महामन्त्री हुन् । यस्तै विक माओवादी कालिकोटका नेता हुन् भने मल्ल दैलेखको नारायण नगरपालिकाका पूर्वउप्रमुख हुन् । गठबन्धनबीच अन्यतर्फ कांगेस, दलिततर्फ माओवादी र महिलातर्फ समाजवादीले उम्मेदवारी दिने सहमति अनुसार उम्मेदवारी दर्ता भएको हो ।
यस्तै, नेकपा एमालेले पनि उम्मेदवारी दर्ता गरेको छ । कर्णालीमा एमालेबाट राष्ट्रियसभा सदस्यका लागि विमलाकुमारी शाही,हिक्मत विक र डिल्लीप्रसाद भट्टले सोमबार उम्मेदवारी दर्ता गरेका हुन् । हुम्लाकी शाहीले महिला, दैलेखका विकले दलित र मुगुका भट्टले अन्य क्लस्टरबाट उम्मेदवारी दर्ता गरेका छन् ।
उम्मेदवारी दर्ता गर्नका लागि पार्टीका नेता र कार्यकर्ताहरु निर्वाचन कार्यालयसम्म पुगेका थिए । कर्णालीमा गठबन्धनका उम्मेदवारहरु निर्वाचित हुने निश्चित छ । कर्णालीमा सत्ता गठबन्धनको मतभार एमालेभन्दा बढी भएकाले पनि गठबन्धनका उम्मेदवारहरुको पल्ला भारी देखिएको हो । ७९ स्थानीय तह रहेको कर्णालीमा स्थानीय तहतर्फ २५ नगरपालिका र ५४ गाउँपालिका गरी १५८ जना मतदाता रहेका छन् ।
जसमध्ये दैलेखको महाबु गाउँपालिकाका अध्यक्ष लक्ष्मण गुरुङ्ग र जाजरकोटको नलगाड नगरपालिका उपप्रमुख सरिता सिंहको मृत्यु भएपछि १५६ जनाले मतदान गर्नेछन् । जसको मतभार २ हजार ९६४ हुन्छ । यस्तै प्रदेशसभातर्फ ४० जना सदस्य छन् । जसको मतभार २ हजार १२० हुन्छ ।
यसकारण स्थानीय तह र प्रदेशसभा सदस्यको गरी कर्णालीमा जम्मा ५ हजार ८४ मतभार हुन्छ । कर्णालीमा कांग्रेसको २ हजार ७० मतभार छ । यस्तै माओवादीको मतभार १ हजार ६०१ रहेको छ । एकीकृत समाजवादीको मतभार भने २४३ रहेको छ ।
तीन दलको गठबन्धन रहेकाले पनि सत्ता गठबन्धनका उम्मेदवारलाई निर्वाचित हुन सहज छ । कांग्रेसको २ हजार ७०,माओवादीको १ हजार ६०१ र एकीकृत समाजवादीको २४३ गरी कर्णालीमा गठबन्धनको मतभार ३ हजार ९१४ छ ।
यस्तै कर्णालीमा एमालेसँग १ हजार १९५ मतभार रहेको छ । त्यसैगरी राप्रपाको मतभार राष्ट्रिय सभामा ५३ रहेको छ । कर्णालीमा ६ वर्षअघि राष्ट्रियसभा सदस्यमा निर्वाचित भैरवसुन्दर श्रेष्ठ, नरपति लुवार र नन्दा चपाईंको कार्यकाल सकिन लागेकाले खाली हुन लागेको उक्त ३ सीटमा निर्वाचन हुन लागेको हो ।
प्रतिक्रिया दिनुहोस !
