पोखरा : बाँदर नियन्त्रणका लागि ‘मेरो रुख म काट्छु’ अभियान चलाउनेबारे पोखरा महानगरपालिका–१९ ले गरेको निर्णयको विरोध भएको छ। वडा कार्यालयले सोमबार सार्वजनिक सूचनामार्फत १० दिनभित्र घर वरपरका रुख कटान गरी बाँदर नियन्त्रण अभियानमा सहयोग पुर्याउन वडाबासीलाई सूचित गरेको थियो।
वडाको उक्त निर्णय सार्वजनिक भएपछि वातावरणकर्मी लगायतले विरोध जनाएका हुन्। महानगरपालिकाका प्रमुख धनराज आचार्यले १९ नम्बर वडाको रुख कटान गर्ने अभियानप्रति गम्भीर ध्यानाकर्षण भएको जनाउनुभएको छ। स्थानीय सरकार सञ्चालन ऐनबमोजिम महानगरपालिकाबाट रुख कटानको कुनै निर्णय नभएको भन्दै सो कार्य नगर्न/नगराउन सेचत गराइएको उनले बताए।
महानगरप्रमुख आचार्यले वडाले जारी गरेको उक्त सूचनाको भ्रममा नपर्नसमेत वडाबासीलाई अनुरोध गरेका छन्। वडाध्यक्ष पुष्पेन्द्र पाण्डेले बाँदरबाट अति प्रभावित क्षेत्र लामाचौर र पुरुन्चौरमा बाँदर नियन्त्रणका लागि घर वरपरका रुख काट्न वडाबासीलाई सूचित गर्नुभएको थियो। वडाको उक्त सूचनाप्रति सामाजिक सञ्जालमा पनि टीकाटिप्पणी भइरहेको छ
प्रतिक्रिया दिनुहोस !
