एमालेलाई कसैको बैशाखी आवश्यक पर्दैन : पूर्वमुख्यमन्त्री राई

उदयपुर : नेकपा एमालेका स्थायी कमिटी सदस्य शेरधन राईले मिसन ८४ मा एमालेले कसैको बैशाखी र गठबन्धनमा निर्भर नरहने बताएका छन् । नेकपा एमाले उदयपुरको नवौँ जिल्ला अधिवेशनलाई सम्बोधन गर्दै राईले आगामी तीन वर्ष नेकपा एमालेको मिसन ८४ को वर्ष भएकाले यसबीचमा जनताको कामलाई तीव्रता दिने बताएका हुन् । 

पूर्वमुख्यमन्त्री राईले जनता बिनाको नेता र पार्टी नहुने भएकाले जनताका आवश्यकतालाई मिहीन ढंगले अध्ययन गर्दै विश्वास जित्ने बताए । उनले मुलुकको समृद्धि र अर्थतन्त्र एमालेबाहेक दलबाट सफलता नहुने भएकाले ८४ मा एमाले एकल बहुमतको सरकार बनाउने अभियानमा अहिलेदेखि नै लागि परेको बताए । 

कोशी प्रदेशका संस्थापक मुख्यमन्त्री समेत रहेका राईले एमाले नेतृत्वको सरकारले मुलुकको विकासमा उल्लेखिय प्रगति हासिल गरेको बताए । 

‘हिजो एमाले नेतृत्व र अहिले अन्य दलको नेतृत्वमा हुँदाको विकासको कामलाई तुलना गर्नुस् कति फरक पाउनु हुनेछ,’उनले भने, ‘सत्ताको बागडोर सम्हाल्नु ठूलो कुरा हैन, भिजनसहित योजना निर्माण गर्नु पर्दछ ।’राईले यतिबेला पार्टी निर्माणको चरण र मिसन ८४ मा रहेकाले सर्वसहमत नेतृत्व चयन गर्न आग्रह गरे ।