गुल्मीका आगलागी पीडितलाई मकै र काँक्राको बीउ,घाइते पशुको निःशुल्क उपचार

गुल्मी : अग्नि पीडितलाई मकै र काँक्राको बीउ सहयोग गरिएको छ। गाउँले किसान एग्रोभेट सेन्टरका सञ्चालक महेन्द्र पोखरेलले मंगलबार इस्मा गाउँपालिका –२ सिदुङखामा पुगेर आगोबाट पीडित परिवारलाई उन्नत जातको मकै र काँक्राको बीउ प्रदान गरेका हुन् । पोखरेले प्रतिपरिवार मनकामना ३ जातको मकै (१ केजी) र भक्तपूरे लोकल जातको काक्रो (१ पोका) वितरण गरेका हुन् ।   

समयमै आकाशबाट पानी पर्ने हो भने चैत र बैशाख महिना मकै रोप्नका लागि उत्तम समय भएपनि प्राकृतिक विपत्तीले कृषकलाई थप समस्या निम्ताएको गाउँले किसान एग्रोभेट सेन्टरका सञ्चालक पोखरेलले बताए । 
‘शनिबार हावाहुरीसहित भएको भीषण आगलागीले केही नागरिकको घरमा राखिएको अन्नपात समेत सखाप भएको ,‘उनले भने,‘पीडितको घाउमा मलम लगाउने उद्देश्यसहित मकै र फलफूलको बीउ वितरण तथा घाइते भएका पशुचौपायको निःशुल्क औषधि उपचार गरिएको हो।'  

पोखरेलले आगलागीमा परेर घाइते भएका पशुचौपायलाई आवश्यक निःशुल्क औषधि वितरण गरेका छन् । त्यस्तै उनले आगलागीबाट जलेका पशुहरूको गोठमै पुगेर पशु उपचार सेवा उपलब्ध समेत गराएका छन् । उनले गुल्मीको सदरमुकाम तम्घासमा विगत १६ वर्षदेखि एग्रोभेट संचालन गर्दै आएका छन् । 
शनिबार हावाहुरीसहित लागेको भीषण आगलागीबाट पालिकाभित्रका २६ वटा घर र ४९ गोठ जलेर पूर्ण नष्ट भएका छन् । आगलागीबाट एक सय ९९ नागरिक प्रभावित भएका छन् । सामुदायिक वनमा लागेको आगो अनियन्त्रित भइ बस्तीमा पुगेपछि करोडौंको क्षति भएको छ।