काठमाडौं : जनता समाजवादी नेपाल पार्टीका अध्यक्ष उपेन्द्र यादवले जसपा विभाजनविरुद्ध सर्वोच्च अदालतमा दायर गरेको रिटमा आज पनि सुनुवाइ हुने भएको छ। रिटको पेशी न्यायाधीश हरिप्रसाद फुयाँल र तिलप्रसाद श्रेष्ठको इजलासमा तोकिएको छ। शुक्रबार सोही इजलासमा सुनुवाइ नसकेपछि 'हेर्दाहेर्दै'मा राखिएको थियो।
जसपा नेपाल फुटाएर गएका अशोक राईसहितका नेताहरूले निर्वाचन आयोगमा नयाँ दल दर्ता गराएपछि त्यसलाई खारेजीको माग गर्दै यादव सर्वोच्च अदालत गएका हुन्।
यादव नेतृत्वको जसपा नेपालबाट छुट्टिएर ७ जना सांसदले २०८१ साल वैशाख २३ गते छुट्टै दल दर्ता गराएका थिए। निर्वाचन आयोगले सो दललाई वैशाख २४ गते दर्ता गरेको थियो।
तर,यादवले जसपा नेपाल छोडेका नेताहरुले दिएको निवेदनको आधारमा अर्को दल दर्ता गर्नू गैरकानुनी भएको जिकिर गर्दै सर्वोच्चमा रिट दिएका थिए। यसैगरी यादवले आफ्नो दल छाडेर गएका सातजना सांसदलाई कामकाजमा रोक लगाउन माग गर्दै अर्को रिट दिएका थिए। दुवै रिटलाई एकसाथ राखेर जेठ १४ सुनुवाइका लागि पेशी तोकिए पनि उक्त दिन हेर्न नभ्याइने सूचीमा राखिएको थियो।
रिटमाथिको पहिलो सुनुवाइमा सर्वोच्चले यादवको पक्षमा अल्पकालीन आदेश जारी गरेको थियो। तर ,जसपा नेपालबाट फुटेर दर्ता भएको राई नेतृत्वको जसपाका सातजना सांसदलाई प्रधानमन्त्री 'प्रचण्ड' लाई विश्वासको मत दिनबाट रोक्न यादव सर्वोच्च पुगे पनि सातैजना सांसदले विश्वासको मत दिएका थिए।
राई नेतृत्वको जसपा प्रचण्ड नेतृत्वको सरकारमा सहभागी भएको छ। जसपाबाट प्रदीप यादव स्वास्थ्य मन्त्री,नवलकिशोर साह सुडी वनमन्त्री र हसिना खान राज्यमन्त्री छन्।
प्रतिक्रिया दिनुहोस !
