८ लाख बढी जरिवानाका दुई कसुरदार पक्राउ

उदयपुर : आठ लाख रुपैयाँभन्दा बढी जरिवाना तोकिएका दुई कसुरदारलाई शुक्रबार उदयपुर प्रहरीले पक्राउ गरेको छ। जिल्ला प्रहरी कार्यालय उदयपुरबाट खटिएको प्रहरी टोलीले अलग–अलग मुद्दामा २ वर्ष कैद र आठ लाख ६८ हजार ६४५ रुपैयाँ जरिवाना तोकिएका उनीहरूलाई पक्राउ गरेको हो। 

पक्राउ पर्नेमा त्रियुगा नगरपालिका-१२ का ५४ वर्षीय वालशेर राई र त्रियुगा-५ खारखोलाका ६७ वर्षीय तेजबहादुर रानामगर रहेको डीएसपी राजन चापागाईंले बताए। राईलाई उच्च अदालत विराटनगरले २०७९ चैत ३ गते लेनदेन मुद्दामा दुई वर्ष कैद पाँच लाख जरिवानाको फैसला सुनाएको उनले बताए।
 

त्यसैगरी रानामगरलाई सर्वोच्च अदालतले २०८० वैशाख २९ गते वन मुद्दामा तीन लाख ६८ हजार ६४५ रुपैयाँ जरिवानाको फैसला सुनाएको उनले बताए। दुवैलाई फैसला कार्यान्वयनका लागि शुक्रबार नै जिल्ला अदालत पठाइएको छ।