जोमसोम : जिल्ला प्रशासन कार्यालय मुस्ताङको पुरानो भवनमा बिहीवार बिहान करिव १:४० बजे आगलागी भएको छ । आगलागीबाट सिडियोका पिएसओ हवल्दार खेमप्रसाद तिवारी घाइते भएका छन् ।
घाइते पिएसओ तिवारीलाई एम्बुलेन्स मार्फत पोखरा झारिँदै गरेको मुस्ताङका सहायक सिडियो रामप्रसाद सुवेदीले जानकारी दिए । घाइते तिवारीको हात र औँलामा चोटपटक लागेको र उनको अवस्था मध्यम रहेको सहायक सिडियो सुवेदीले बताए ।
आगलागी विद्युत सट वा ग्यास लिक भएर हुन सक्ने उनको भनाइ छ । तिवारी आगलागी भएको थाहा पाएपछि झ्यालबाट हाम फालेर बाहिर निस्किएका थिए ।
आगलागी प्रहरी र स्थानीयबासीको सहयोगमा नियन्त्रणमा लिइएको थियो । उक्त प्रशासनको भवनको माथिल्लो तलाको एक कोठामा सहायक सिडियोको क्वाटर र अर्कोमा सिडियोका पिएसओ बस्ने गर्थे।
आगलागीबाट प्रशासन कार्यालयको भवनमा आशिंक क्षति भएको छ । घटनाको विस्तृत विवरण आउन बाँकी रहेको प्रहरीले जनाएको छ ।
प्रतिक्रिया दिनुहोस !
