कारमा २५% कर लगाउने ट्रम्पको निर्णय, अमेरिकी शेयर बजारमा गिरावट

वासिङटन डिसी : अमेरिकी राष्ट्रपति डोनाल्ड ट्रम्पले बुधबार विदेशबाट आयात गरिने  कार र कारका पार्टपुर्जामा २५ प्रतिशत भन्सार लगाउने घोषणा गरेका छन्। ट्रम्पले उक्त कदमले अमेरिकी उत्पादन क्षेत्रलाई बढावा दिने बताएका छन्। यसले वार्षिक १०० अर्ब डलर राजस्व बढ्ने अपेक्षा गरिएको छ। 

कारमा लगाउने भनिएको कर अप्रिल १ देखि लागू हुनेछ। 

कर लगाउने निर्णयले अमेरिकी अटोमोबाइल कम्पनी जनरल मोटर्सको शेयर बुधबार ३% ले घटेको थियो। साथै जीप र क्रिसलरको मूल कम्पनी स्टेलान्टिसको शेयर पनि लगभग ३.६% ले घटेको थियो।

यसले अमेरिकामा नयाँ कारखानाहरू खोल्ने ट्रम्पले तर्क गरेका छन्। क्यानडा र मेक्सिकोमा बनाइएका विभिन्न अटो पार्टपुर्जा र तयार सवारी साधनहरू अब अमेरिकामा उत्पादन गर्न सकिने उनले बताए। ट्रम्पले आफ्नो निर्णय स्थायी भएको बताएका छन्।

क्यानडाका प्रधानमन्त्री मार्क कार्नीले ट्रम्पको कर लगाउने निर्णयको आलोचना गरेका छन्। उनले भने, 'यो हामीमाथि प्रत्यक्ष आक्रमण हो, हामी हाम्रा कामदार र कम्पनीहरूको सुरक्षा गर्नेछौं।'

अमेरिकामा कारको मूल्य बढ्ने सम्भावना

रिपोर्टहरूका अनुसार अमेरिकामा नयाँ कारको औसत मूल्य अहिले लगभग ४९,००० अमेरिकी डलर छ। कर बढेपछि नयाँ शुल्कहरू लागू गरियो भने आयातित कारहरूको मूल्यमा थप १२,५०० बढ्न सक्ने जनाइएको छ।

समाचार एजेन्सी पीटीआईका अनुसार यो शुल्कले सवारी साधन निर्माताहरूको लागत बढाउन सक्छ र बिक्रीमा गिरावट ल्याउन सक्छ। अमेरिकी कार कम्पनीहरूले आफ्ना धेरैजसो अटो पार्टपुर्जा अन्य देशहरूबाट आयात गर्छन्।

युरोपेली आयोगका अध्यक्ष उर्सुला भोन डेर लेयनले पनि अमेरिकी निर्णयप्रति निराशा व्यक्त गरेकी छिन्। उनले यो व्यवसायी र उपभोक्ताहरूका लागि नराम्रो निर्णय भएको उल्लेख गरेकी छन्।

ट्रम्पको उक्त कदमले विश्वव्यापी व्यापार युद्ध सुरु हुने सम्भावना बढाएको छ। 
 
ट्रम्पको कदमले अमेरिकामा उल्लेखनीय कार उत्पादन अस्थायी रूपमा रोकिने सम्भावना पनि रहेको विज्ञहरुको भनाइ छ। 

संयुक्त राज्य अमेरिकाले गत वर्ष लगभग ८० लाख कार आयात गरेको थियो, जुन लगभग २४० अर्ब डलर बराबरको व्यापार थियो।

अमेरिकामा कार पठाउनेमा मेक्सिको सबैभन्दा अगाडि छ। यसपछि दक्षिण कोरिया, जापान, क्यानडा र जर्मनी पर्छन्।

ट्रम्पको यो नयाँ कदमले विश्वव्यापी कार व्यापार र यसको आपूर्ति श्रृंखलालाई असर गर्ने खतरा छ।