खाटमुनि लुकाएर राखेको ४ किलो गाँजासहित एकजना पक्राउ, अनुसन्धानका लागि १० दिनको म्याद
चैत २७, २०८१ बुधबार १७:१९:१४
रौतहट : रौतहटको चन्द्रपुर नगरपालिका वडा नम्बर ७ स्थित बनबहुअरी टोलबाट लागुऔषध गाँजासहित एकजना पक्राउ परेका छन् । विशेष सूचनाका आधारमा इलाका प्रहरी कार्यालय चन्द्रनिगाहपुरबाट खटिएको टोलीले ५० वर्षीय सुरेन्द्र साहलाई पक्राउ गरेको हो ।
साहलाई उनको घर अगाडि सडकमा फेला पारेर नियन्त्रणमा लिइएको प्रहरीले जनाएको छ । त्यसपछि गरिएको घर खानतलासीमा साह सुत्ने कोठाको खाटमुनि “बाबा पोता” लेखिएको झोलामा गाँजा लुकाइएको अवस्थामा फेला परेको थियो ।
प्रहरी निरीक्षक साजन कुमार शर्माका अनुसार बरामद भएको उक्त गाँजा ४ किलो १०० ग्राम रहेको छ । पक्राउ परेका साहमाथि लागुऔषधसम्बन्धी कसूरमा अनुसन्धानका लागि रौतहट जिल्ला अदालतबाट १० दिनको म्याद थप गरि थप अनुसन्धान भइरहेको प्रहरी निरीक्षक शर्माले बताए ।
प्रतिक्रिया दिनुहोस !
