धनगढी : सुदूरपश्चिम प्रदेश सरकारले आगामी आर्थिक वर्षका लागि ३३ अर्ब ४७ करोडको बजेट ल्याएको छ । अबेर बसेको प्रदेशसभा बैठकमा प्रदेशका आर्थिक मामिलामन्त्री बहादुर सिंह थापाले आर्थिक वर्ष ०८२/८३ को बजेट प्रस्तुत गरेका हुन् ।
प्रदेश सरकारले ३३ अर्ब ४७ करोड ६० लाख ४८ हजारको बजेट सार्वजनिक गरेको छ । जसमध्ये ५९ दशमलव २५ प्रतिशत अथवा १९ अर्ब ८३ करोड २ लाख ६ हजार रकम पुँजीगततर्फ विनियोजन गरेको छ । यस्तै चालुतर्फ १० अर्ब २० करोड ८१ लाख ८२ हजार रकम विनियोजन गरेको छ । यो कुल बजेटको ३० दसमलव ४९ प्रतिशत हो ।
सुदूरपश्चिममा सत्तारुढ दलहरूकै बीचमा बजेटबारे कुरा नमिल्दा दिउँसो १ बजेका लागि प्रस्तुत हुने भनिएको बजेट भाषण अपराह्न ५ बजे हुँदै ७ बजेसम्मका लागि सरेको थियो । राति ७ बजे बसेको प्रदेशसभा बैठकमा आर्थिक मामिलामन्त्री बहादुर सिंह थापाले बजेट प्रस्तुत गरेका हुन् । बजेटमा भौतिक पूर्वाधार मन्त्रालयका लागि मात्रै १५ अर्ब ४० करोड रकम विनियोजन गरिएको छ । यो भनेको प्रस्तुत बजेटको झन्डै आधा रकम हो । भौतिक पूर्वाधारमन्त्री र मुख्यमन्त्रीका बीचमा बजेटको सिलिङमा कुरा नमिल्दा बजेट प्रस्तुत गर्ने कार्य पनि ढिला भएको बताइएको छ ।
आर्थिक मामिलामन्त्री थापाले भौतिक पूर्वाधार र भूमि व्यवस्था कृषि तथा सहकारी मन्त्रालय बाहेकका मन्त्रालयको कुल बजेट नै कति हो भन्ने कुरा बजेट वक्तव्यमै समेट्न सकेनन् । भूमि व्यवस्था कृषि तथा सहकारी मन्त्रालयका लागि भने ३ अर्ब ३० करोड १० लाख रकम विनियोजन गरिएको छ ।
संसद्को बजेट भाषण बजेटको अंकभन्दा पनि सैद्धान्तिक भाषण जस्तो देखिएको थियो । बजेटमा खासै नयाँ कुरा समेटिन सकेका छैनन् । कृषिका केही कार्यक्रमहरू आकर्षक देखिए पनि अरू मन्त्रालयका बजेटमा परम्परागत शैली नै देखिएको छ ।
कार्यक्रमहरू समेटिए पनि कति बजेटका हुन भन्ने कुरा पनि बजेट वक्तव्यमा नआउँदा बजेट भाषण खल्लो जस्तै भएको थियो । कृषितर्फ भने प्रदेशका ३२ वटा निर्वाचन क्षेत्रमा हरेक निर्वाचनमा २ बाली उत्पादनका लागि बजेट विनियोजन गरिएको छ ।
खेलकुदतर्फ एक जिल्ला एक क्रिकेट मैदानका लागि १ करोड ३५ लाख विनियोजन गरिएको छ । कैलालीको टीकापुर र कञ्चनपुरको महाकाली प्रादेशिक अस्पतालमा मानसिक स्वास्थ्यको जनशक्ति थपिनेबाहेक स्वास्थ्यको क्षेत्रमा पनि नयाँ खासै कार्यक्रम देखिएन । लागुऔषध नियन्त्रण, शिशु कक्षाका शिक्षकलाई तालिम, कर्मचारी तालिम, अध्ययन अनुसन्धान जस्ता शैद्धान्तिक भाषणले बजेट भाषण खासै दमदार नआएको प्रतिक्रियाहरू आउन थालेका छन् ।
कार्यक्रमअनुसार बजेट अंकमा नआउँदा हतारहतारमा बजेट वक्तव्य तयार पारेको प्रष्ट झल्किन्थ्यो । केही मन्त्रालयहरूले शनिबार मात्रै बजेटको सिलिङ दिएकाले वक्तव्यमा दिनुपर्ने धेरै कुराहरू छुटेका थिए ।
आर्थिक मामिलामन्त्री बहादुर सिंह थापाले प्रस्तुत गरेको बजेट प्रणालीका चुनौतीबाटै पनि प्रदेशको बजेट दमदार नआएको भान हुन्थ्यो । उनले विगतको बजेटले प्रतिफल दिन नसकेको, आन्तरिक राजस्व संकलन बढाउन नसकेको, बहुबर्षीय योजनाहरूमा बजेटको अभाव हुने गरेको, जस्ता चुनौती औंल्याएका थिए ।
प्रतिक्रिया दिनुहोस !
