माओवादी संकल्प : गुट–उपगुट भंग गर्ने

काठमाडौं : नेकपा माओवादी केन्द्रमा झांगिँदै गएको गुट—उपगुट भंग गर्ने संकल्प गरिएको छ । पार्टीमा पछिल्लो समय व्यक्तिगत स्वार्थहरू हाबी भएको निष्कर्ष छ । माओवादी पार्टी चरम असन्तुष्टि र गुटबन्दीमा फसेको नेताहरूले उल्लेख गरेका छन् । अध्यक्ष पुष्पकमल दाहालले चार दिनसम्म चलेको स्थायी कमिटी बैठकले गुटलाई भत्काउँदै पार्टीलाई एकताबद्ध बनाउने निर्णय भएको बताए । 

गुटबन्दी गर्नेलाई कारबाही गर्ने अनुगमन प्रणालीको समेत विकास गर्ने बैठकको निष्कर्ष छ । बैठकले दसैंपछि केन्द्रीय समितिको बैठक बोलाउने बताएको छ । फुटको संघारमा रहेको पार्टीले चुनौतीलाई तत्काल व्यवस्थापन गरेको छ । पार्टीमा नेतृत्व हस्तान्तरण, नेतृत्व पुस्तान्तरण र पार्टी पुनर्गठनको माग गर्दै आएका उपमहासचिव जनार्दन शर्मालाई पार्टी अध्यक्ष प्रचण्डले सार्वजनिक रूपमा आत्मआलोचित हुन निर्देशन दिएका छन् । 

केही समयपहिले नेता शर्माले सार्वजनिक मञ्चमा पार्टी अध्यक्ष प्रचण्ड भ्रष्ट भएको भनेर कडा टिप्पणी गरेका थिए । पार्टी उपाध्यक्ष एवं प्रवक्ता अग्निप्रसाद सापकोटाले भने, ‘बैठकमा नेता शर्मालाई आत्मआलोचना गर्न सबैले आग्रह गर्नुभएको छ तर, उहाँले गरिसक्नु भएको छैन । उहाँ (शर्मा)लाई आत्मआलोचना गर्नुपर्छ भनेर रियलाइज भएको छ ।’

पार्टी अध्यक्ष प्रचण्डले लोकतान्त्रिक व्यवस्था ल्याउने माओवादी पार्टीलाई एकताबद्ध गर्ने चुनौती तत्काल हल भएको दाबी गरेका छन् । ‘पार्टीलाई एकताबद्ध गर्ने जुन हाम्रो सामु चुनौती थियो, त्यो चुनौतीलाई जिम्मेवारीपूर्वक पूरा गरेका छौं’, बैठकपछि सञ्चारकर्मीहरूलाई प्रतिक्रिया दिँदै भने, ‘धेरै गम्भीर छलफलपछि पार्टी एकताबद्ध भएको छ । हामीले सामूहिक रूपमा पार्टीलाई अझ सुढृढ र एकताबद्ध गर्न प्रण गरेका छौं ।’

सबै खाले गुटबन्दी अन्त्य गर्ने सामूहिक रूपले संकल्प लिएको बताउँदै उनले थपे, ‘फेरि जनतामा गएर शक्ति आर्जन गर्छौं । देशमा देखा परेको विसंगति अन्त्यका लागि आन्दोलन गर्ने निर्णय गरेका छौं ।’

यता बैठकपछि उपमहासचिव शर्माले बैठकमा आफूले उठाएका सबै एजेन्डामा छलफल भएको बताए । उनले भने, ‘बैठकमा वैचारिक, संगठनात्मक, विधिबारे गम्भीर छलफल भयो ।’

पार्टी प्रवक्ता सापकोटाका अनुसार बैठकमा उपमहासचिव शर्माले उठाएको विषयमा खुल्ला छलफल भएको छ । पार्टी बैठकमा असन्तुष्टि व्यक्त गर्दै आएका नेता शर्माले बैठकको निर्णय पुस्तिकामा हस्ताक्षर पनि गर्दैनथे । तर प्रवक्ता सापकोटाका अनुसार अब भने निर्णय पुस्तिकामा शर्माले हस्ताक्षर गर्ने प्रतिबद्धता जनाएका छन् । उनी भन्छन्, ‘बैठकमा जनार्दनजीले माइन्युटमा सही गर्ने प्रतिबद्धता जनाउनु भएको छ ।’

माओवादीभित्र भइरहेको दन्तबजानमा बैठकले पूर्णविराम लागेको नेताहरूले दाबी गरेका छन् । प्रवक्ता सापकोटाले भने, ‘पार्टी फुट्छ, फुटको संघार छ भन्ने सबै हल्ला र भ्रमलाई बैठकले पूर्णरूपमा खारेज गरिदिएको छ । पार्टीलाई एकताबद्ध बनाएर अघि बढ्ने कुरामा सबै सहमत भएका छन् ।’

माओवादीले आन्दोलनबाटै पार्टीमा नेतृत्व तयार पार्ने बैठकको निष्कर्ष छ । त्यसका लागि योजना, नीति तथा कार्यक्रम छिट्टै ल्याउने प्रवक्ता सापकोटाको भनाइ छ । ‘बैठकमा नेताहरूले राखेको धारणाले क. प्रचण्डलाई गम्भीर बनाएको छ । उहाँले समाजवादी क्रान्तिको आधार तयार पार्दै पार्टीमा नेतृत्व पनि तयार गर्ने जाने भन्नुभयो’, प्रवक्ता सापकोटाको जिकिर छ ।

माओवादी पार्टीलाई रूपान्तरण गर्न महाअभियान सञ्चालन गर्ने निर्णय भएको जानकारी उनले दिए । बैठकको निर्णयमा भनिएको छ, ‘पार्टीलाई शुद्धीकरण र रूपान्तरण गर्न महाअभियान सञ्चालन गर्ने निर्णय भएको छ ।’ 

माओवादी केन्द्रबाट विगतमा फुटेर गएका नेत्रविक्रम चन्द विप्लवसँग पार्टी एकता गर्ने बैठकले निर्णय गरेको छ । वार्ता समिति गठन गरेर पार्टी एकताका लागि वातावरण तयार गरिने प्रवक्ता सापकोटाले जनाए ।