जन्मने बित्तिकै नवजात शिशुलाई आमाको नाङ्गो छातीमा टाँसेर राख्नुपर्छ । यस्तो गर्नाले शिशुलाई न्यानो महसुस हुनका साथै यसले बिगौती दूध आउनमा मद्दत गर्छ । बच्चाको बौद्धिक विकास पनि राम्रोसँग हुन्छ ।
अपरेसन गरेर शिशु जन्माएकी आमाले पनि अरूको सहयोगमा शिशु जन्माएको एक घण्टाभित्रै स्तनपान गराउन सक्छिन् । आमाले सही आसनमा राखेर स्तनपान गराएमा दूध राम्रोसँग आउन मद्दत गर्छ । नवजात शिशुलाई दिउँसो र राति गरी कम्तीमा १० देखि १२ पटक स्तनपान गराउनु पर्छ । शिशुले एकतर्फको स्तन पूरै चुसिसकेर आफंै छोडेपछि बल्ल अर्को स्तन चुसाउन लगाउनु पर्छ ।
शिशुलाई आवश्यक पर्ने सम्पूर्ण पौष्टिक तत्त्व आमाको दूधमा पाइने हुनाले शिशु जन्मेदेखि ६ महिना पूरा भएसम्म शिशुलाई पूर्ण स्तनपान गराउनु पर्छ । ६ महिना पूरा भएपछि थप पोषिलो र नरम खाना खुवाउनुका साथसाथै कम्तीमा दुई वर्षको उमेरसम्म स्तनपान पनि गराउनु पर्छ ।
स्तनपान गराइरहेकी आमाले साबिकभन्दा दुई पटक थप पोषिलो खाना विशेष गरेर आइरनयुक्त तथा पशुपन्छीजन्य खानेकुराहरू, फलफूलका साथै ज्वानोको झोलजस्ता खानेकुरा खुवाउनु पर्छ ।
यी संकेत देखाएमा शिशुले स्तनपान गर्न चाहेको भन्ने कुरा आमाले बुझ्नु पर्छ—
- शिशु चल्मलाउने/छटपटाउने गरेमा ।
- मुख आँ गरी टाउको यताउता गर्न थालेमा ।
- जिब्रोलाई पटक पटक भित्र—बाहिर गर्न थालेमा ।
- औंला वा मुट्ठी चुस्न थालेमा ।
- रोइरहेको बेलामा ।
प्रतिक्रिया दिनुहोस !
