नुवाकोट : कुमाल समुदायको बसोबास रहेको नुवाकोटको तल्लो पिपल्टारमा पिउने पानीको उपकरणहरू प्रदान गरिएको छ।
विदुर नगरपालिका-५ तल्लो पिपलटारमा रहेका कुमाल बस्तीमा खानेपानी सेवा सरल र सहज बनाउनका लागि विदुर नपा कार्यालयले आवश्यक उपकरणसहित पिउने पानीको पाइप प्रदान गरेको हो। विदुर नपाका मेयर राजन श्रेष्ठले कुमाल समुदायको बस्तीमा पुगेर पाइप लगायतका उपकरण हस्तान्तरण गरे।
पिउने पानीको सुविधासँगै स्थानीयवासीलाई सुविधा पुगेको र यसलाई दीर्घकालीन र गुणस्तरीय रूपमा कार्य गर्न मेयर श्रेष्ठले सुझाव दिए। स्थानीयवासीबाट नगरपालिकामा माग भए अनुसार वडा कार्यालयको सिफारिस अनुसार पाइप प्रदान गरिएको उनले बताए।
खानेपानीको पाइप सम्बन्धित उपभोक्तालाई हस्तान्तरण गरिएसँगै जडान गरिएको वडाध्यक्ष लीलानाथ न्यौपानेको भनाइ छ। उनका अनुसार यसबाट ३० घर कुमाल समुदायलाई सुविधा पुगेको छ।
५० एमएमको चारसय मिटर पाइप हस्तान्तरण गरिएको हो। यससँगै यसअघि कायम रहेको खानेपानी योजनाको स्तरोन्नति तथा सुदृढीकरणको कार्यसमेत गरिएको छ।
प्रतिक्रिया दिनुहोस !
