राजीनामा दिँदै परियारले भने- फरक खालको राजनीतिक अभियानमा सक्रिय हुन्छु

काठमाडौं : राष्ट्रिय स्वतन्त्र पार्टीका नेता सन्तोष परियारले फरक खालको राजनीतिक अभियानमा सक्रिय हुने भन्दै पार्टी परित्याग गरेका छन्। उनले कार्यवाहक सभापति र महाचिवलाई इमेलमार्फत राजीनामा पठाएर आजकै मितिदेखि साधारण सदस्यसमेत नरहनेगरी राजीनामा दिएको उल्लेख गरेका छन्।

'बदलिँदो परिस्थितिलाई आत्मसाथ गर्दै यस ऐतिहासिक घडीमा नेपाली राजनीतिक आन्दोलनलाई साँचो अर्थमा राष्ट्र हित र जनताको जीवनसँग जोड्नलाई म फरक खालको राजनीतिक अभियानमा सक्रिय हुनुपर्ने स्थितिका कारण राष्ट्रिय स्वतन्त्र पार्टीको कुनै पनि जिम्मेवारीमा नरहने र पार्टीको साधरण सदस्यसम्म नरहने निवेदन गर्दछु,' राजीनामा पत्रमा भनिएको छ। 

नेता परियारले निरन्तर पार्टीमा विचारको बहस गरे पनि त्यसलाई स्थापित गर्न नसकेको उल्लेख गरेका छन्। नेपाली समाजको विशिष्ट बनावट र चरित्र अनुसारको पार्टीको विचार निर्माण गर्न नसकेको उनले दुःख व्यक्तसमेत गरेका छन्।

'भदौ २३ र २४ गते नेपालको राजनीतिक इतिहासमा भएको पछिल्लो पुस्ता जेनजीको विद्रोहले नेपाली राजनीतिको परम्परागत जडतालाई खारेज गरिदिएको छ। यो आन्दोलनले यथाअवस्थामा अब नेपाली राजनीति अगाडि जान नसक्ने र नवयुगको नेतृत्व गर्न नसक्ने प्रमाणित भएको छ। जेनजी विद्रोहले समकालीन नेपाली समाजको चेतना निर्माणमा निकै ठूलो भूमिका खेलिरहेको छ भन्ने मेरो बुझाइ हो। यसका लागि हरेक राजनीतिक पार्टी र व्यक्तिले पनि आगामी नेपाली राजनीतिलाई अझ फराकिलो हिसाबमा अवस्था आएको छ,' उनले भनेका छन्।