सुनसरी : नेकपा (एमाले) ले सुनसरीका निर्वाचन क्षेत्रमा उम्मेदवार परिवर्तन गरेको छ । मंगलबार उम्मेदवारी दर्ता हुने दिन आज बिहानै एमालेले सुनसरीका दुई निर्वाचन क्षेत्रमा उम्मेदवार परिवर्तन गरेको भएको हो।
यसअघि एमाले अध्यक्ष केपी शर्मा ओलीले सुनसरी–२ बाट जगदीश कुसियत र सुनसरी–४ बाट कांग्रेस परित्याग गरी एमाले प्रवेश गरेका अबुल हुसैन अन्सारीलाई टिकट दिएका थिए । तर उम्मेदवारी दर्ताको दिन बिहानै पार्टीले निर्णय उल्ट्याउँदै सुनसरी–२ मा प्रदेशसभा सदस्यसमेत रहेका रेवतिरमण भण्डारी र सुनसरी–४ मा पुनः जगदीश कुसियतलाई उम्मेदवार बनाउने निर्णय गरेको छ ।
एमाले सचिव शेरधन राईका अनुसार सम्बन्धित क्षेत्रमा टिकट वितरणप्रति व्यापक असन्तुष्टि देखिएपछि उम्मेदवार परिवर्तन गर्नुपरेको हो । “टिकट पाएका उम्मेदवारप्रति पार्टीभित्र र स्थानीय तहमा ठूलो असन्तुष्टि देखियो, त्यसैले निर्णय सच्याइएको हो,” सचिव राईले भने ।
विशेषगरी अबुल हुसैन अन्सारी कांग्रेस छाडेर एमाले प्रवेश गरेको भोलिपल्टै टिकट खोसिनुले एमालेको निर्णय प्रक्रियामाथि प्रश्न उठेको छ । पार्टी प्रवेशसँगै टिकट पाउने र त्यसको भोलिपल्टै उम्मेदवार फेरिनुले कार्यकर्तामाझ थप अन्योल सिर्जना गरेको छ ।
सुनसरी–१ मा पनि एमालेभित्र उम्मेदवारलाई लिएर तीव्र विवाद चलिरहेको छ । सुरुमा सूर्य पन्धाक लिम्बुलाई टिकट दिएको एमालेले पछि टिकराम लिम्बुलाई उम्मेदवार बनाएको थियो । तर अहिले फेरि जयकुमार राईलाई उम्मेदवार बनाउने विषयमा शीर्ष नेताबीच छलफल भइरहेको एमाले स्रोतले जनाएको छ ।
सचिव राईका अनुसार सुनसरी–१ को उम्मेदवार परिवर्तनका विषयमा पार्टी अध्यक्ष केपी शर्मा ओलीसँग समेत निरन्तर छलफल भइरहेको छ । क्षेत्र–१ मा पनि निर्णय फेरिन सक्छ, यसबारे अध्यक्षसँग संवाद चलिरहेको उनले बताए । सुनसरी-३ मा एमालेले भगवती चौधरीलाई टिकट दिएको छ ।
प्रतिक्रिया दिनुहोस !
