विराटनगर : आगामी फागुन २१ गते हुने प्रतिनिधिसभा सदस्य निर्वाचनका लागि मोरङमा मनोनयन दर्ता गराएकामध्ये शुक्रबार ६ जनाले आफ्नो उम्मेदवारी फिर्ता लिएका छन्। उम्मेदवारी दिएकामध्ये २ जनाको रद्द भएको छ। ६ जनाको फिर्ता र २ जनाको रद्द भएसँगै मोरङमा अब १ सय १० जनाको उम्मेदवारी कायम भएको छ। माघ ६ गते १ सय १८ जनाले उम्मेदवारी दर्ता गराएका थिए। उम्मेदवारी फिर्ता लिनेमध्ये २ जना राजनीतिक दलका र ४ जना स्वतन्त्र उम्मेदवार छन्। उनीहरुले तोकिएको समयसीमाभित्र उम्मेदवारी फिर्ता लिएको निर्वाचन अधिकृतको कार्यालयले जनाएको छ।
मोरङको क्षेत्र नम्बर १ बाट जनता समाजवादी पार्टी (जसपा) नेपालका दुर्गाप्रसाद दर्लामी र क्षेत्र नम्बर ६ बाट नेपाल मजदुर किसान पार्टी (नेमकिपा)का तिलकराम राजवंशीले चुनावी दौडबाट बाहिरिने निर्णय गरेका हुन्। यसैगरी, स्वतन्त्रतर्फबाट उम्मेदवारी दिएका मोरङ क्षेत्र नम्बर ३ का सुरेश लिम्बू, कञ्चन न्यौपाने र दलबहादुर थापा तथा क्षेत्र नम्बर ६ का राम खत्रीले पनि उम्मेदवारी फिर्ता लिएका छन्।
निर्वाचन अधिकृतको कार्यालयका अनुसार प्रतिनिधिसभा निर्वाचन ऐन, २०७४ को दफा २५ को उपदफा ४ बमोजिम उम्मेदवारी फिर्ता लिएका उम्मेदवारहरूको नाम आधिकारिक सूचीबाट हटाइसकिएको छ। यसअघि नै मोरङको क्षेत्र नम्बर ४ बाट उज्यालो नेपाल पार्टीका विनोद परियार र क्षेत्र नम्बर ६ बाट जसपाका मोहमद जाविरको उम्मेदवारी रद्द भइसकेको थियो। उम्मेदवारी फिर्ता र रद्दसमेत गरी हालसम्म ८ जना उम्मेदवार चुनावी मैदानबाट बाहिरिएका छन्।
उम्मेदवारी दर्ता गराएका १ सय १८ जनामध्ये ६ जनाले फिर्ता लिएका हुन् भने २ जनाको रद्द भएको हो। अब मोरङमा १ सय १० जना उम्मेदवार प्रतिनिधिसभा सदस्यका लागि चुनावी प्रतिस्पर्धामा रहेका छन्। उम्मेदवारको संख्या घटेसँगै दलगत रणनीति, स्वतन्त्र उम्मेदवारको भूमिका र मत विभाजनको सम्भावनाका बारेमा राजनीतिक चासो अझ बढेको छ।
प्रतिक्रिया दिनुहोस !
