सुनसरी : सुनसरीको बराहक्षेत्र नगरपालिका–५ स्थित तीनकुनेबाट प्रहरीले प्रतिबन्धित लागूऔषधसहित दुई जनालाई पक्राउ गरेको छ । प्रहरी चौकी भरौलबाट खटिएको गस्ती टोलीले को.२१ प १४९० नम्बरको मोटरसाइकलमा सवार धरान–१७ का नबिन तामाङ र प्रेम जोगीलाई शंका लागि चेकजाँच गर्दा उनीहरूको साथबाट ठूलो परिमाणमा लागूऔषध बरामद गरिएको ईलाका प्रहरी कार्यालय महेन्द्रनगरका प्रहरी निरीक्षक दिवस कुवरले बताए ।
पक्राउ परेकाहरूको साथबाट ट्रामाडोल ३ हजार ७३० क्याप्सुल र नाइट्राजाम १५० ट्याब्लेट बरामद गरिएको प्रहरी निरीक्षक कुवरले बताए । पक्राउ परेका दुवै जनालाई इलाका प्रहरी कार्यालय महेन्द्रनगरको हिरासतमा राखेर थप अनुसन्धान भइरहेको उनले बताए ।
नेपाल–भारत खुला सीमाको फाइदा उठाउँदै तस्करहरूले लागूऔषध नेपाल भित्र्याउने र बिक्री गर्ने गतिविधि बढ्दै गएको छ । जसका कारण विशेषगरी कलेज पढ्ने विद्यार्थी तथा युवाहरू लागूऔषधको कुलतमा फस्दै गएको प्रहरीको भनाइ छ ।
प्रतिक्रिया दिनुहोस !
