झापा : झापाको भद्रपुरमा मोटरसाइकलको ठक्करबाट पैदलयात्रीको मृत्यु भएको छ। मृत्यु हुनेमा भद्रपुर नगरपालिका-२ निवासी ६४ वर्षीय कुलप्रसाद खरेल रहेको जिल्ला प्रहरी कार्यालय झापाले जनाएको छ।
प्रहरीका अनुसार आज साँझ ६:२० बजेको समयमा मेची राजमार्गअन्तर्गत भद्रपुर बनियानी सडक खण्डको भद्रपुर-२ स्थित सगरमाथा चोकमा बनियानिबाट भद्रपुर तर्फ आइरहेको मे ७ प २०३४ नम्बरको मोटरसाइकलले पैदलयात्री खरेललाई ठक्कर दिएको थियो। दुर्घटनामा परी घाइते भएका खरेललाई उपचारका लागि ओमसाई पाथीभरा अस्पताल पुराउँदा डाक्टरले मृत घोषणा गरेका थिए।
त्यस्तै दुर्घटनामा मोटरसाइकल चालक भद्रपुर-६ निवासी २१ वर्षीय अनुराग घोषको अनुहारमा चोट लागेकोले गम्भीर अवस्थामा प्रादेशिक अस्पताल भद्रपुरमा पुर्याएको र त्यहाँ सामान्य उपचारपश्चात् थप उपचारका लागि ओमसाई पाथीभरा अस्पताल भद्रपुर रेफर गरिएको प्रहरीले जनाएको छ। मोटरसाइकलको पछाडि सवार भद्रपुर-६ निवासी २१ वर्षीय मन्दिप दंगालको अवस्था सामान्य रहेको र मोटरसाइकल प्रहरी नियन्त्रणमा लिएको जनाइएको छ।
प्रतिक्रिया दिनुहोस !
