मापसे गरी मोटरसाइकल चलाउँदा दुर्घटना : युवकको ज्यान गयो, श्रीमती घाइते
माघ २५, २०८२ आइतबार २०:४०:२९
विराटनगर : मोरङको रंगेलीमा आइतबार दिउँसो मादक पदार्थ सेवन (मापसे) गरी चलाइएको मोटरसाइकल दुर्घटना हुँदा एक जना युवकको मृत्यु भएको छ भने उनकी श्रीमती घाइते भएकी छन्।
हुलाकी सडक खण्डअन्तर्गत रंगेली नगरपालिका-२ स्थित चेकापुल नजिक मोटरसाइकल अनियन्त्रित भएर दुर्घटना भएको हो। प्रहरीका अनुसार को ३० प ३९१५ नम्बरको मोटरसाइकल दिउँसो करिब १:२५ बजे आफैं सडकमा पल्टिँदा चालक र पछाडि सवार दुवै जना घाइते भएका थिए। गम्भीर अवस्थामा रहेका चालकलाई तत्काल रंगेली अस्पताल पुर्याइए पनि उपचार सुरु हुनासाथ चिकित्सकले मृत घोषणा गरेका थिए।
दुर्घटनामा मृत्यु हुने व्यक्ति रंगेली नगरपालिका-५ का ३३ वर्षीय रामनारायण महतो रहेको मोरङ प्रहरीका प्रवक्ता डीएसपी हरिनन्दन चौधरीले जानकारी दिए। महतोकी श्रीमती ३० वर्षीया द्रौपति महतो घाइते भएकी छन्। उनको रंगेली अस्पतालमै उपचार भइरहेको र अवस्था सामान्य रहेको प्रहरीले जनाएको छ।
प्रारम्भिक अनुसन्धानबाट मोटरसाइकल चालकले मादक पदार्थ सेवन (मापसे) गरेको खुलेको छ। मापसे र तीव्र गतिका कारण दुर्घटना भएको हुनसक्ने प्रहरीको अनुमान छ। प्रहरीले घटनाको थप अनुसन्धान गरिरहेको छ।
प्रतिक्रिया दिनुहोस !
