कांग्रेस नेता मात्र होइन, नीति नै बदलेर आएको छ : महामन्त्री घिमिरे

काठमाडौं : नेपाली कांग्रेसका महामन्त्री गुरुराज घिमिरेले आफ्नो पार्टीले नेता मात्र नभई नीति नै बदलेर आएको बताएका छन् । पार्टी कार्यालयमा सञ्चारकर्मीसँग कुरा गर्दै महामन्त्री घिमिरेले नेता र नेतृत्व दुबै बदलेको कांग्रेसले अब युवापुस्ताको आवाज सुन्दै अपनत्व बोकेर अगाडि बढ्ने दावी गरे ।

उनले विशेष महाधिवेशनले नयाँ पुस्ताको भावना, चाहना र जनतासँग अझै घनिष्ट भएर काम गर्ने अवसर दिएको बताउँदै देशलाई सही दिशामा मार्गनिर्देश गरेको बताए । उनले भने, ‘कांग्रेसको इतिहास र गौरवलाई जोगाउँदै नयाँ पुनर्जागरण भएको छ । यसले आम मतदाताको निराशालाई आशामा बदलिएको छ । कांग्रेसमा पुनर्जागरण ऊर्जा पैदा भएको छ । यसले धेरै ठूला उपलब्धिहरू दिलाउनेछ र देश अनि जनता लाभान्वित हुन्छन् ।’

महामन्त्री घिमिरेले जेनजी पुस्ता नेपालीको हरेक घरमा रहेको र यसले नेपाली इतिहासमा परिवर्तनका लागि ठूलो योगदान गरेको भन्दै उनीहरू नै भविष्यको नेपाल भएको पनि बताएका छन् । महामन्त्री घिमिरेले जेनजीका मागहरू जायज भएकाले नै भदौ २३ र २४ गते यो उथलपुथल भएको र राजनीतिक सुशासन कायम राख्ने कुरालाई पार्टीले गम्भीरतापूर्वक लिएको समेत बताएका छन् । उनले थपे, ‘जेनजी विद्रोहको उद्देश्य देशमा सुशासन कायम, भ्रष्टाचार निर्मुल र सामाजिक सञ्जाल चल्न दिनु नै थियो । यी सबै माग र मुद्दालाई नेपाली कांग्रेसले बोकेर अगाडि बढेको छ ।’