रौतहट : आसन्न फागुन २१ को प्रतिनिधिसभा सदस्य निर्वाचनलाई लक्षित गर्दै बालबालिकालाई कुनै पनि राजनीतिक तथा चुनावी गतिविधिमा संलग्न नगराउन जिल्ला प्रशासन कार्यालय रौतहटले स्पष्ट निर्देशन जारी गरेको छ ।
फागुन २१ गते २०८२ मा हुने निर्वाचनलाई स्वच्छ, मर्यादित र बालमैत्री बनाउन प्रशासनले सबै पक्षलाई सचेत गराएको हो । सहायक प्रमुख जिल्ला अधिकारी जितेन्द्रकुमार यादवले शुक्रबार जारी गरेको प्रेस विज्ञप्तिमार्फत बालबालिका राष्ट्रको भविष्य भएकाले उनीहरूलाई राजनीतिक प्रभाव, जोखिमपूर्ण गतिविधि तथा मानसिक–शारीरिक शोषणबाट टाढा राख्नु राज्य, राजनीतिक दल र समाजको साझा जिम्मेवारी भएको उल्लेख गरेका छन् ।
विज्ञप्तिमा नेपालको संविधान, बाल अधिकारसम्बन्धी ऐन तथा अन्तर्राष्ट्रिय प्रतिबद्धताले समेत बालबालिकालाई राजनीतिक प्रयोजनका लागि प्रयोग गर्न निषेध गरेको स्पष्ट पारिएको छ । प्रशासनले सबै राजनीतिक दल, उम्मेदवार, समर्थक तथा सरोकारवालालाई चुनावी सभा, जुलुस, प्रचारप्रसार लगायतका गतिविधिमा बालबालिकाको प्रयोग नगर्न विशेष आग्रह गर्दै निर्वाचन प्रक्रियालाई कानुनसम्मत र सभ्य बनाउन सबै पक्षलाई सहयोग गर्न आह्वान गरेको छ ।
प्रतिक्रिया दिनुहोस !
