काठमाडौँ : महिला, बालबालिका तथा ज्येष्ठ नागरिकमन्त्री श्रद्धा श्रेष्ठले आसन्न निर्वाचन निष्पक्ष, स्वतन्त्र र समावेशी तरिकाले सम्पन्न गराउन सरकार जिम्मेवार र प्रतिवघ रहेको बताएकी छन् ।
सोमबार काठमाडौँमा आयोजित एक कार्यक्रममा बोल्दै उनले निर्वाचनका लागि आम मतदातालाई सूचित, सचेत र जिम्मेवार बनाउन मतदाता शिक्षा कार्यक्रम पनि सुरु गरिएको जानकारी गराइन् । मन्त्री श्रेष्ठले निर्वाचन तयारीको कामलाई सरकार, निर्वाचन आयोग, नागरिक समाजलगायतका सबै पक्षले तीव्रताका साथ अघि बढाएको समेत बताइन् । मन्त्री श्रेष्ठले महिला मतदाताको संख्या बढाउने कुरामा पनि सरकारले आवश्यक वातावरण बनाउने काम गरिरहेको बताइन् ।
उनले भनिन्, ‘फागुन २१ को प्रतिनिधिसभा निर्वाचनका लागि सरकार, निर्वाचन आयोग, राजनीतिक दल, नागरिक संस्थाहरू सबै अग्रसर भएर अत्यन्तै तीव्र गतिमा काम गरिरहेका छन् । यसै तयारी स्वरूप हिजो आइतबारबाट निर्वाचन आयोगले पनि नागरिकहरूलाई सूचित, सचेत र जिम्मेवार मतदाता बनाउनका लागि मतदाता शिक्षा कार्यक्रमको पनि औपचारिक रूपमा सुरुवात गरिसकेको छ ।’
उनले भनिन्, ‘जेन–जी आन्दोलनपछिको यो विषय परिस्थितिमा सम्माननीय प्रधानमन्त्री सुशीला कार्कीको नेतृत्वमा वर्तमान सरकार बनेको छ । यसको मुख्य म्यान्डेट पनि यो फागुन २१ गतेको प्रतिनिधिसभा निर्वाचनलाई कसरी निष्पक्ष, स्वच्छ, स्वतन्त्र, समावेशी र लोकतान्त्रिक तरिकाले गराउने जिम्मेवारी हाम्रो रहेको छ । यसमा हामी सबै तत्पर भएर काम गरिरहेका छौँ ।’ मन्त्री श्रेष्ठले निर्वाचनमा बालबालिकाहरूको दुरुपयोग हुन नदिन पनि सरकार सचेत रहेको बताएकी छन् ।
प्रतिक्रिया दिनुहोस !
