खामेनी हत्यापछि चर्कियो इजरायल–हिज्बुल्लाह द्वन्द्व, लेबननमा मारिए ३१ जना

काठमाडौं : इरानी सर्वोच्च नेता अयातोल्लाह अलि खामेनीको हत्यापछि हिंसाको घटना विस्तार हुँदै गएको छ । इजरायलले लेबनानमा गरेको हमलामा ३१ जनाको मृत्यु भएको र १४९ जना घाइते भएको लेबनानी स्वास्थ्य मन्त्रालयले जनाएको छ । 

मृत्यु हुनेको यो संख्या प्रारम्भिक मात्र रहेको लेबनानी स्वास्थ्य मन्त्रालयको विज्ञप्तिमा भनिएको छ । यसअघि इजरायलले लेबननका ५० बढी शहर तथा गाउँका बासिन्दालाई आक्रमणबाट बच्न तुरुन्तै आफ्नो घर छाड्न चेतावनी दिएको थियो ।

इरानका सर्वोच्च नेता खामेनी हत्याको बदला लिन भन्दै लेबनानबाट हिज्बुल्लाहले इजरायलमा क्षेप्यास्त्र र ड्रोन प्रहार गरेपछि लडाइँ चर्किएको हो । जवाफमा अहिले लेबनानका लक्ष्यहरूमा इजरायलले पनि आक्रमण गरिरहेको इजरायली सेनाले विज्ञप्तिमार्फत जनाएको छ ।

हिज्बुल्लाहले इरानका सर्वोच्च नेता खामेनीको हत्याको बदला लिन आफूले इजरायलमा आक्रमण गरेको पुष्टि गरेको छ । इजरायली सेनाका अनुसार, क्षेप्यास्त्र इजरायलका खुला क्षेत्रमा खसेका थिए । हिज्बुल्लाह शिया मुस्लिम राजनीतिक र सैन्य संगठन हो, जसलाई इरानबाट बलियो समर्थन प्राप्त छ । उक्त संगठनले इजरायलको अस्तित्वको अधिकारको विरोध गर्छ ।

अमेरिका र इजरायलले शनिबार इरानमा संयुक्त हवाई हमला गर्दा त्यहाँका सर्वोच्च नेता आयातोल्लाह अली खामेनीसहित झण्डै ४० जना शीर्ष नेता तथा अधिकारी मारिएका छन् । जवाफमा इरानले पनि इजरायल तथा अमेरिकी सैन्य अखडा भएका यूएईलगायत खाडी मुलुकमा क्षेप्यास्त्र प्रहार गरिरहेको छ ।  यता अमेरिकाका राष्ट्रपति डोनाल्ड ट्रम्पले ‘सबै उद्देश्य पूरा नहुँदासम्म’ इरानमा आक्रमण जारी रहने बताएका छन् ।