विराटनगर : हुलाकी सडक खण्डअन्तर्गत मोरङको कटहरी गाउँपालिका–३ बाट मंगलबार बिहान स्रोत नखुलेको रकम बरामद भएको छ । उक्त रकम ओसारपसारमा प्रयोग गरिएको गाडी र चालकलाई प्रहरीले नियन्त्रणमा लिएको छ ।
मोरङ प्रहरी प्रमुख एसपी कवित कटवालले स्रोत नखुलेको ४ लाख ६२ हजार ५ सय नेपाली रूपैयाँ बरामद भएको जानकारी दिए । जिल्ला प्रहरी कार्यालय मोरङबाट खटिएको इन्स्पेक्टर अभिषेक श्रेष्ठ नेतृत्वको टोलीले प्रदेश १–०२–००२ च ६६१० नम्बरको टाटा योद्धा पिकअप गाडीलाई बिहानका राति १ :३५ बजेतिर नियन्त्रणमा लिएर खानतलासी गरेको थियो ।
विराटनगरबाट कटहरीतर्फ जाँदै गरेको गाडी चेकजाँच गर्दा स्रोत नखुलेको नेपाली रूपैयाँ फेला परेको हो । बरामद भएको रकमको स्रोत खुलाउन नसकेपछि गाडीसहित चालक जहदा गाउँपालिका–२ का अन्दाजी २४ वर्षीय विशाल टुडूलाई नियन्त्रणमा लिइएको एसपी कटवालले बताए ।
बरामद भएको रकम,नियन्त्रणमा लिइएको गाडी र चालकलाई जिल्ला प्रहरी कार्यालय मोरङमा राखिएको छ । उक्त रकम अवैध हुण्डी कारोबारको भएको हुनसक्ने प्रहरीको अनुमान छ । यद्यपि,थप अनुसन्धानबाट सबै कुरा प्रष्ट हुने प्रहरीले जनाएको छ ।
प्रतिक्रिया दिनुहोस !
